Alla Pugacheva Kiprdagi uyini sotishga qaror qildi
Mashhur qo‘shiqchi Alla Pugacheva Kiprdagi hashamatli uyini sotib, xavfsizroq joyga ko‘chishni rejalashtirmoqda. Bu haqda Zamin.uz xabar berdi.
Bu qarorga Yaqin Sharqdagi notinch vaziyat va uyining Britaniya harbiy bazalariga yaqin joylashgani sabab bo‘lgan. Ma’lumki, bu bazalar Eron dronlari hujumiga duch kelishi mumkin.
Bu haqda rieltor Mark Gershkovich o‘z kuzatuvlari bilan bo‘lishdi. Mutaxassisning aytishicha, Limasol shahrida joylashgan bu ko‘chmas mulkni 4 million yevrodan 6 million yevrogacha sotish mumkin.
Qizig‘i shundaki, mintaqadagi siyosiy keskinlik Kiprdagi uy-joy narxlariga salbiy ta’sir ko‘rsatmagan. Aksincha, qo‘shni davlatlardan kelayotgan badavlat insonlar oqimi sababli ko‘chmas mulk qiymati oshishi mumkin.
Alla Pugacheva va uning turmush o‘rtog‘i Maksim Galkin 2019 yilda Kiprda uch qavatli, 600 kvadrat metr maydonga ega qasr qurishni boshlagan edi. O‘sha vaqtda loyihaning qiymati 2,5 million yevrodan oshgan.
Dengiz bo‘yida joylashgan bu uy o‘zining panoramali derazalari va shinam terassalari bilan ajralib turadi. Hozirgi kunda xonanda oilasi bilan xavfsizroq joy izlamoqda.
