Istanbulda o'quvchi biologiya o'qituvchisini pichoqlab o'ldirdi

2023-yil 2-mart kuni Istanbuldagi Borsa kasb-hunar va texnika Anadolu litseyida og‘ir voqea sodir bo‘ldi. Bu haqda Zamin.uz xabar berdi.

17 yoshli o‘quvchi F.S.B. pichoq bilan hujum qilib, biologiya o‘qituvchisi Fotima Nur Chelikni hayotdan olib ketdi.

Hujum natijasida yana bir o‘qituvchi va bir o‘quvchi jarohat oldi. Ma’lumotlarga ko‘ra, gumonlanuvchi voqeadan ikki kun oldin ruhiy xastaliklar shifoxonasidan chiqqan.

U maktab jadvalini tekshirib, Fotima Nur qayerda bo‘lishini oldindan bilib olgan. Hodisa kuni sinfga kirib, avval o‘qituvchiga, keyin esa uni to‘xtatmoqchi bo‘lganlarga hujum qilgan.

Marhuma o‘qituvchi avvalroq ham aynan shu o‘quvchi haqida Intizom qo‘mitasida gapirib, “hayotimiz xavf ostida” deb ogohlantirgani aytilmoqda. Hodisadan so‘ng maktabda darslar bir kunga to‘xtatildi, xavfsizlik choralari kuchaytirildi.

Turkiyaning 81 viloyatida o‘qituvchilar “Maktabda o‘lmoqchi emasmiz” shiori ostida bir kunlik ish tashlash aksiyasi o‘tkazdi. Turkiya Adliya vaziri Akin Gurlek va Prezident Rajab Toyib Erdo‘g‘an bu hodisani keskin qoralab, aybdorlar jazosiz qolmasligini bildirdi.

Marhuma o‘qituvchi Fotima Nur tug‘ilgan shahri Konyada so‘nggi manzilga kuzatildi. Bu voqea Turkiyada yoshlar orasidagi ruhiy bosim, ijtimoiy taranglik va maktablarda xavfsizlik masalasi jiddiy e’tibor talab qilayotganini yana bir bor ko‘rsatdi.