O‘zbekiston delegatsiyasi Buyuk Britaniyada tajriba almashdi
O‘zbekiston mahallalari uyushmasi raisi o‘rinbosari Javdat Inog‘omov boshchiligidagi delegatsiya Buyuk Britaniyaga xizmat safarini amalga oshirdi. Bu haqda Zamin.uz xabar berdi.
Tashrif davomida Esseks grafligining Brentvud shahri mahalliy boshqaruv kengashi vakillari bilan uchrashuv o‘tkazildi. Uchrashuvda fuqarolarning o‘zini o‘zi boshqarish tizimini takomillashtirish va tajriba almashish masalalari muhokama qilindi.
Mazkur uchrashuvda O‘zbekistondagi mahalla institutining faoliyati haqida batafsil ma’lumot berildi. Xususan, aholi muammolarini hal etish, ijtimoiy qo‘llab-quvvatlash, yoshlar va xotin-qizlar bilan ishlashdagi o‘rni haqida so‘z yuritildi.
Britaniyalik mutaxassislar mahallaning xalqqa yaqinligi va ijtimoiy birlikni ta’minlashdagi ahamiyatini yuqori baholadilar. O‘z navbatida, o‘zbekistonlik vakillar Britaniya tizimidagi institutsional boshqaruv, moliyaviy mustaqillik va vakolatlarning aniq taqsimlanishini o‘rgandilar.
Muloqot yakunida tomonlar o‘zaro hamkorlikni tizimli davom ettirishga kelishib oldilar. Kelgusida qo‘shma seminarlar o‘tkazish va amaliy tashriflarni tashkil etish rejalashtirildi.
Ushbu hamkorlik mahalliy boshqaruv tizimini xalqaro standartlar asosida rivojlantirishga, shuningdek, jamoat manfaatlarini samarali himoya qilishga xizmat qiladi.
