Qozog‘istonda go‘sht narxi eksport tufayli yuqori qolmoqda
Qozog‘istonda go‘sht narxi yuqori darajada saqlanib qolmoqda, chunki bu mahsulot qo‘shni davlatlarga, xususan, O‘zbekistonga faol eksport qilinmoqda. Bu haqda Zamin.uz xabar berdi.
Bu haqda Qozog‘iston qishloq xo‘jaligi vaziri o‘rinbosari Yerbol Tasjurekov ma’lumot berdi. Jurnalistlar vazir o‘rinbosaridan chorvachilikni rivojlantirish uchun davlat dasturlariga katta mablag‘lar yo‘naltirilgan bo‘lsa-da, nima uchun go‘sht narxlari pasaymaganini so‘rashgan.
Tasjurekovning aytishicha, mamlakatda go‘sht tanqisligi yo‘q, lekin mol go‘shtining katta qismi tashqi bozorga chiqarilayotgani sababli narxlar yuqoriligicha qolmoqda. Unga ko‘ra, go‘sht mahsulotlariga talab yuqori bo‘lgani uchun ayniqsa O‘zbekistonga katta hajmda eksport qilinmoqda.
Vazir o‘rinbosari Qozog‘istonda yiliga qariyb 430 ming tonna go‘sht ishlab chiqarilishini, ichki bozor ehtiyoji esa 400 ming tonnani tashkil etishini ta’kidladi. Qolgan mahsulotlar eksportga yo‘naltiriladi.
Shuningdek, yaqin uch yil ichida chorvachilikni yanada rivojlantirishga qaratilgan kompleks reja qabul qilinishi rejalashtirilganini ham bildirdi.
