Eron qo‘shni davlatlarga hujum qilmaslikka qaror qildi

Eron prezidenti Mas’ud Pezeshkiyon mamlakat qo‘shni davlatlarga hujum qilmaslikka qaror qilinganini e’lon qildi. Bu haqda Zamin.uz xabar berdi.

Unga ko‘ra, bu qaror kecha rahbariyatning muvaqqat kengashi yig‘ilishida qabul qilingan. Pezeshkiyon ta’kidlashicha, endi qo‘shni davlatlarga raketa uchirilmaydi va ularga qarshi zarba berilmaydi.

Faqatgina o‘sha davlat hududidan Eronga hujum uyushtirilsa, javob chorasi ko‘riladi. Eron rahbari, shuningdek, mamlakat hech qanday shartlarsiz taslim bo‘lmasligini keskin aytdi.

U qo‘shni davlatlardan uzr so‘rab, Tehron boshqa mamlakatlarga qarshi tajovuz qilish niyatida emasligini yana bir bor urg‘uladi. Pezeshkiyonning fikricha, bugungi vaziyatda Eron o‘z hududini himoya qilishga majbur.

U aholiga minnatdorlik bildirib, xalqaro huquq normalariga amal qilinmayotgani, hatto tibbiyot muassasalari va shifoxonalarga ham zarbalar berilayotganini qayd etdi. Bu holat Eronning o‘zini himoya qilish zaruratini yanada kuchaytiradi.

Pezeshkiyon, xalqaro hamjamiyatni tinchlik va barqarorlikni saqlashga chaqirdi.