AQSh Eron neftini egallashni rejalashtirmoqda
Vashington Eron neftini to‘liq egallash va shu orqali Tehronni asosiy daromad manbaidan mahrum qilish niyatida ekanligini bildirdi. Bu haqda Zamin.uz xabar berdi.
Bu haqda Amerikaning energetika ustunligi bo‘yicha milliy kengashi direktori Jarrod Eygen Fox News telekanali orqali ma’lumot berdi. Jurnalistlarning Yaqin Sharqdagi ziddiyatlar neft narxiga qanday ta’sir ko‘rsatishi haqidagi savoliga javob berar ekan, Eygen Ho‘rmuz bo‘g‘ozidagi muammolardan xavotirlanmaslik kerakligini ta’kidladi.
Uning so‘zlariga ko‘ra, AQSh Eron rahbariyatidan barcha neftni tortib olishni rejalashtirmoqda. Shu hafta davomida Eron dunyodagi eng muhim neft tranziti yo‘nalishlaridan biri hisoblangan Ho‘rmuz bo‘g‘ozini amalda yopilganini e’lon qildi.
Ushbu taqiq barcha turdagi kemalarga, jumladan, tijorat va neft tashuvchi tankerlarga ham tegishli bo‘ldi. Natijada strategik ahamiyatga ega bo‘lgan yo‘lakda harakat deyarli to‘xtab qoldi, ayrim kemalar esa raketa zarbalariga nishon bo‘lmoqda.
Soha mutaxassislarining fikricha, neft oqimlarini nazorat qilish uchun borayotgan kurash mintaqadagi geosiyosiy ziddiyatlarning asosiy qismiga aylanib ulgurgan. Fors ko‘rfazidan amalga oshiriladigan neft eksportidagi har qanday uzilish jahon energetika bozorlari hamda yoqilg‘i narxlariga o‘zining jiddiy ta’sirini ko‘rsatishi shubhasiz.
