Eron neft omborlari zarbalari kislotali yomg'irga sabab bo'ldi

Eron hududidagi neft omborlariga qilingan zarbalardan so‘ng, ayrim hududlarda kislotali yog‘ingarchilik kuzatilayotgani haqida xabarlar tarqaldi. Bu haqda Zamin.uz xabar berdi.

Mutaxassislar bu holat atmosferaga chiqarilgan zararli moddalar bilan bog‘liq bo‘lishi mumkinligini aytishmoqda. Eron Qizil Yarim Oy jamiyati ham bu ma’lumotni tasdiqladi.

Tashkilot vakillariga ko‘ra, neft yoki yonilg‘i saqlanadigan ob'yektlarda yuz bergan portlashlar havoga ko‘p miqdorda zaharli kimyoviy birikmalar chiqaradi. Bu esa keyinchalik kislotali yog‘ingarchilik paydo bo‘lishiga olib kelishi mumkin.

Mutaxassislar tushuntirishicha, bunday hujumlar natijasida atmosferaga yonish mahsulotlari, xususan, oltingugurt dioksidi va azot oksidlari kabi moddalar tarqaladi. Ushbu kimyoviy elementlar havodagi namlik bilan reaksiyaga kirishib, sulfat va nitrat kislotalarning kuchsiz eritmalarini hosil qiladi.

Natijada bu moddalar yog‘ingarchilik bilan yerga tushganda, kislotali yomg‘ir hosil bo‘ladi. Bunday yog‘ingarchilik tabiat va inson salomatligi uchun xavf tug‘dirishi mumkin.

Mutaxassislar kislotali yomg‘irning o‘simliklar o‘sishiga salbiy ta’sir ko‘rsatishi, binolar va infratuzilma obyektlariga zarar yetkazishi mumkinligini ta'kidlaydi. Shuningdek, bu yomg‘ir inson terisida qichishish hissini keltirib chiqarishi va nafas yo‘llariga ta’sir qilishi ham ehtimoldan xoli emas.