Eron maktabiga zarba berishda AQSh ayblandi
Eronning Minab shahrida joylashgan maktabga qilingan zarba urushning eng fojiali va bahsli voqealaridan biriga aylandi. Bu haqda Zamin.uz xabar berdi.
Xalqaro axborot vositalari ushbu hujum ortida kim turgani haqida turli ma’lumotlarni tarqatmoqda. Reuters axborot agentligining xabariga ko‘ra, maktabga ehtimol Amerika Qo‘shma Shtatlari harbiylari tomonidan zarba berilgan bo‘lishi mumkin.
Shu bilan birga, The New York Times nashri maktabga qilingan hujumning yonida joylashgan harbiy obyektga berilgan zarba bilan bir vaqtda amalga oshirilganiga e’tibor qaratdi. Rasmiy Vashington esa bu voqea yuzasidan tekshiruv olib borilayotganini ma’lum qilib, fuqarolik obektlariga ataylab zarba berilgani haqidagi ayblovlarni rad etmoqda.
Biroq hozircha Amerika tomonidan bu masala bo‘yicha aniq dalillar taqdim etilmagan. Eron 7 mart kuni BAAdagi AQShning Al-Darfa harbiy bazasiga zarba berdi.
Tehronning ta’kidlashicha, aynan shu baza Minabdagi maktabga qilingan hujumda ishtirok etgan bo‘lishi mumkin. Eron Qurolli Kuchlari bosh shtabi tarqatgan ma’lumotlarga ko‘ra, mazkur bazaga qilingan zarba natijasida halok bo‘lgan va jarohat olgan Amerika harbiylarining soni 200 nafardan oshgan bo‘lishi mumkin.
Ayni paytda ushbu bazaga qilingan hujum haqidagi xabarlar tarqalgan paytda Amerika sobiq prezidenti Donald Tramp Eronga nisbatan “juda kuchli zarbalar” berilishi mumkinligini bildirgan. Ayrim kuzatuvchilar bu bayonotni Amerika harbiylari orasida katta yo‘qotishlar bo‘lishi mumkinligi bilan bog‘lamoqda.
Urush davomidagi eng bahsli bayonotlardan biri Isroil bosh vaziri Binyamin Netanyaxu tomonidan aytildi. Uning so‘zlariga ko‘ra, u va Donald Tramp birgalikda “dunyoni qutqarish” vazifasini bajarishmoqda.
Qiziq tomoni shundaki, bu gaplar jiddiy ohangda aytilgan. Kuzatuvchilarning fikricha, “dunyoni qutqarish operatsiyasi” boshlanishidan oldin dunyodagi vaziyat hozirgidan ancha tinchroq edi.
Shu orada Eron tashqi ishlar vaziri Abbos Aroqchi Amerika telekanallaridan biriga intervyu berdi. Suhbat davomida jurnalist undan: “Mamlakatingizga Amerika harbiylari quruqlik orqali hujum qilishi mumkin.
Siz bundan qo‘rqmaysizmi?” deb so‘radi. Aroqchi bu savolga keskin javob berib: “Yo‘q, aksincha, biz ularni kutyapmiz”, dedi.
Bu bayonot ayrim tahlilchilar tomonidan juda qat’iy chaqiriq sifatida baholangan. Ko‘pchilik urushni qoralayotgan bo‘lsa-da, ayrim kuzatuvchilar fikricha, masofadan turib raketa otishdan ko‘ra, yuzma-yuz jang qilish ancha ochiq va to‘g‘ridan-to‘g‘ri kurash hisoblanadi.
Shu bilan birga, ba’zi tahlilchilar Amerika qo‘shinlari bunday ssenariyga jur’at qilishi qiyin bo‘lishi mumkinligini ta’kidlamoqda. Chunki Eron hududiga kirib jang qilish oddiy harbiy operatsiya emas, balki murakkab va katta xavf-xatarlar bilan bog‘liq jarayon hisoblanadi.
Agar urush faqat bir kishini o‘ldirish bilan yakunlanganida edi, Eron albatta boshqa yo‘l tutardi, biroq hozirgi vaziyat murakkab va ko‘p tomonlama hisob-kitoblarga asoslangan. Shuning uchun ham xalqaro hamjamiyat ushbu mojaroning tinch yo‘l bilan hal etilishi uchun harakat qilmoqda.
