Tramp neft narxining oshishini kichik to'lov deb atadi
AQSh prezidenti Donald Tramp Yaqin Sharqdagi mojaro sabab neft narxlarining keskin oshishiga o‘z munosabatini bildirdi. Bu haqda Zamin.uz xabar berdi.
U o‘zining ijtimoiy tarmoqdagi sahifasida bu holatni xavfsizlik va tinchlik yo‘lida to‘lanadigan “juda kichik to‘lov” deb atadi. Trampning fikricha, Eronning yadroviy tahdidi bartaraf etilgach, neft narxlaridagi bu qisqa muddatli ko‘tarilish tez orada kamayadi.
U bu o‘sishni AQSh va butun dunyo xavfsizligi bilan solishtirganda unchalik katta muammo emasligi bilan izohladi. Reuters agentligining xabariga ko‘ra, 9 mart, dushanba kuni bozor ochilishi bilan Brent markali neft narxi taxminan 20 foizga oshib, bir barreli 111,04 dollarga yetdi.
Shu bilan birga, WTI markali neft narxi ham 16,8 foizga ko‘tarilib, 106,17 dollarga chiqqan. Solishtirish uchun aytilsa, 28 fevraldan oldin neft narxi bir barreli atrofida 70 dollar edi.
Tahlillar bo‘yicha asosiy xavotir Ho‘rmuz bo‘g‘ozining uzoq muddatga yopilib qolishi ehtimoli bilan bog‘liq. Chunki dunyoda neftning taxminan 20 foizi aynan shu yo‘lakdan o‘tadi.
Bundan tashqari, Qatarning suyultirilgan tabiiy gazi ham asosan shu hudud orqali tashiladi. Shuningdek, bu narx o‘sishi 2022 yil fevralida Rossiyaning Ukrainaga bostirib kirishi ortidan kuzatilgan eng keskin neft narxi ko‘tarilishlaridan biri hisoblanadi.
O‘sha davrda ham jahon bozorida neft narxi 100 dollardan yuqori darajaga ko‘tarilgan edi.
