Eron Ho‘rmuz bo‘g‘ozi kemalaridan yashirincha pul to‘lay boshladi
Eron hukumati Ho‘rmuz bo‘g‘ozi orqali o‘tayotgan tashuvchi kemalardan norasmiy tarzda pul to‘lovlarini undirishga kirishgan. Bu haqda Zamin.uz xabar berdi.
Bloomberg xalqaro agentligining e’lon qilgan ma’lumotlariga ko‘ra, har bir kema uchun taxminan ikki million AQSH dollari miqdorida qo‘shimcha to‘lov talab qilinmoqda. Bu holat aslida bo‘g‘ozi orqali o‘tish uchun joriy etilgan yangi bojxona to‘loviga o‘xshaydi.
Hozirgi kunda bu to‘lovning qanday tartibda va qaysi valyutada amalga oshirilishi aniq emas, chunki jarayon hali rasmiy tizimga kiritilmagan. Mavzu bo‘yicha so‘rov olingan manbalar shuni ta’kidlashmoqdaki, ushbu to‘lovlar keng jamoatchilikka e’lon qilinmagan holda sirli tarzda amalga oshirilmoqda.
Eron Tashqi ishlar vazirligi esa bu holatga hozirgacha rasmiy izoh bermagan. Ba’zi tahlilchilar fikriga ko‘ra, Tehron mojaroni hal qilish va mintaqadagi vaziyatni barqarorlashtirish bo‘yicha keng ko‘lamli diplomatik kelishuv doirasida bunday to‘lovlarni kelajakda rasmiylashtirish g‘oyasini ko‘rib chiqmoqda.
Biroq, Fors ko‘rfazi hududidagi boshqa davlatlar uchun bu chora hali norasmiy bo‘lsa ham qabul qilishga qiynaydi. Ular bu harakatni o‘z davlat suverenitetiga xavf solish, kelajak uchun xavfli pretsedent yaratish va energiya eksport yo‘llari ustidan nazoratni suiiste’mol qilish deb baholashmoqda.
Mintaqada keskinlik boshlanganidan beri Ho‘rmuz bo‘g‘ozi orqali o‘tgan kemalar soni sezilarli darajada kamayib ketgan. O‘tishga ruxsat berilgan oz sonli kemalarning aksariyati Eron bilan to‘g‘ridan-to‘g‘ri bog‘liq bo‘lib, bu esa dunyo iqtisodiyotiga jiddiy ta’sir ko‘rsatmoqda.
