Moskvada qiz onasi bilan janjallashib 88 ming dollarni derazadan tashladi

Moskva shahrining Meshchan tumanida yosh qiz onasi bilan janjallashib, ichida jami 88 ming dollar bo‘lgan 100 dollarlik pullar solingan sumkani derazadan tashlab yubordi. Bu haqda Zamin.uz xabar berdi.

Rossiyadagi turli axborot manbalari, xususan Mash, 112, REN TV va TASSning xabar berishicha, qiz onasi bilan tortishuv paytida pullarni havoga uloqtirishga qaror qilgan. Pul havoga sochilgach, ko‘chadagi o‘smirlar ularning bir qismini yig‘ib oldi.

Telegram-kanallar ma’lumotiga ko‘ra, o‘smirlar topilgan pullarning ayrim qismini o‘zlari uchun saqlab, qolganini yoqib yuborgan. Ba’zi kupyuralar esa qushlar tomonidan olib ketilgan.

REN TV nashri yozishicha, tumshug‘ida pul bor qarg‘alar hayratda qolgan odamlar ustida uchib yurgan. Mash xabariga ko‘ra, o‘smirlar 83 ming dollarni o‘zlarida qoldirib, qolgan 5 ming dollarni yoqib yuborgan.

So‘ngra ular topilgan pullar haqida ota-onalariga xabar bergan. Kattalar esa pulni egasiga qaytarishga qaror qilgan.

REN TV ham eng ko‘p summaning egasiga qaytarilganini tasdiqladi. TASS agentligi huquq-tartibot idoralari manbasiga tayanib, 83 ming dollar topilganini ma’lum qildi.

Ammo pullar egasiga faqat barcha holatlar oydinlashtirilgach qaytarilishi aytilmoqda. Shuningdek, TASS o‘smirlar tomonidan pullarning bir qismining yoqilganini qayd etdi, lekin qushlar olib ketgan kupyuralar haqida ma’lumot bermadi.

Ushbu voqea shahar ahlini diqqatini tortdi va ijtimoiy tarmoqlarda katta qiziqish uyg‘otdi. Ko‘pchilik bolaning bu harakatiga hayratda bo‘ldi, ba’zilari esa holatni hazil tariqasida qabul qildi.