Hormuz bogozida ilk savdo kemasi xavfsiz harakatlandi
Eron davlat teleradiokompaniyasining xabar berishicha, Vashington va Tehron o‘rtasida erishilgan ikki haftalik sulh kelishuvidan so‘ng, Ho‘rmuz bo‘g‘ozi orqali ilk savdo kemasi muvaffaqiyatli o‘tib oldi. Bu haqda Zamin.uz xabar berdi.
Mazkur kema bo‘g‘ozdan xavfsiz o‘tishi uchun Eron rasmiylaridan tegishli ruxsatni olgan. Pentagon rahbari Pit Hegset matbuot anjumanida bo‘g‘oz kemalar qatnovi uchun ochiq ekanini tasdiqladi.
Uning qayd etishicha, Eron harbiylari savdo kemalarining xavfsizligini ta’minlamoqda va har ikki taraf vaziyatni kuzatuv ostida ushlab turibdi. Shunga qaramay, AQSH harbiylari kelishuvga rioya etilishini nazorat qilish maqsadida Yaqin Sharq hududida yaqin masofada joylashgan.
Ayni paytda Reuters agentligi manbalari Eron ayrim hududlarda cheklovlarni saqlab qolayotgani va ruxsatsiz o‘tishga uringan kemalar uchun xavf mavjudligidan ogohlantirmoqda. Keyinchalik Eronning Fars agentligi Isroilning Livandagi harbiy harakatlari fonida tankerlar qatnovi vaqtincha to‘xtatilganini ma’lum qildi.
Pokistonda bo‘lib o‘tgan muzokaralar davomida Eron rasmiylari bo‘g‘ozni cheklangan va nazoratli rejimda ochishga va’da bergan bo‘lsa-da, xalqaro kemachilik kompaniyalari hali ham jiddiy xavfsizlik kafolatlarini talab qilmoqda. Eslatib o‘tamiz, fevral oyi oxiriga qadar dunyo neft ta’minotining beshdan bir qismi aynan shu yo‘lak orqali tashilgan.
Harbiy keskinlik avj olgach, Eron bo‘g‘ozni to‘sib qo‘ygan edi. Aprel oyi boshida AQSH va Eron ikki haftalik sulhga kelishdi.
Donald Tramp Vashington bo‘g‘ozni ochish sharti bilan Eron hududiga zarbalar berishni to‘xtatishini bildirgan. Isroil ushbu tinchlik tashabbusini qo‘llab-quvvatlagan bo‘lsa-da, Livandagi vaziyat murakkabligicha qolmoqda.
Sakkizinchi aprel kuni Isroil Livanga urush boshlanganidan buyon eng yirik zarbani berganini e’lon qildi. Hozirgi vaziyatda mintaqadagi xavfsizlik va logistika masalalari jahon hamjamiyati diqqat markazida qolmoqda.
