Kuzbasslik shifokorlar klinik o‘lim holatidagi ayolni hayotga qaytarishdi
Rossiyaning Kuzbass hududida tibbiyot xodimlari hayratlanarli natijani qayd etishdi. Bu haqda Zamin.uz xabar berdi.
Qirq uch yoshli ayol og‘ir infarkt tashxisi bilan mahalliy kardiodispanserga olib kelingan. Shifoxonaning qabul bo‘limida bemorning ahvoli keskin yomonlashib, u klinik o‘lim holatiga tushgan.
Shifokorlar vaziyatning o‘ta jiddiyligiga qaramay, taslim bo‘lmay, bemorni qutqarish uchun barcha zarur choralarni ko‘rishga kirishdilar. Mutaxassislar yurak massaji va suniy nafas berish jarayonini bir daqiqa ham to‘xtatmasdan davom ettirdilar.
Shu bilan bir vaqtda bemorning tanasi chuqur tekshiruvdan o‘tkazildi. Tahlillar natijasida yurak qon tomirlaridan biri butunlay to‘silib qolgani aniqlandi.
Shifokorlar zudlik bilan operatsiyaga kirishib, qon aylanishini tiklash maqsadida tomirga stent o‘rnatdilar. Viloyat rahbariyati tomonidan taqdim etilgan ma’lumotlarga ko‘ra, odatda reanimatsiya jarayoni o‘ttiz daqiqagacha davom etadi.
Agar bu vaqt ichida yurak faoliyati tiklanmasa, biologik o‘lim qayd etiladi. Biroq ushbu holatda shifokorlarning tinimsiz harakati samara berdi.
Qariyb yetmish bir daqiqadan so‘ng bemorning yuragi yana urib ketdi. Eng quvonarlisi shundaki, uzoq davom etgan klinik o‘lim holatiga qaramay, bemorning miya faoliyati shikastlanmagan.
Hozirgi vaqtda shifokorlar uning ahvolini barqaror deb baholamoqdalar va bemor nazorat ostida davolanishni davom ettirmoqda. Ushbu voqea tibbiyot tarixidagi noyob qutqaruv operatsiyalaridan biri sifatida e’tirof etilmoqda.
