Mojtaba Xomanaiy Eron AQSH va Isroil ustidan g‘alaba qozonganini e’lon qildi
Eron oliy rahnamosi Mojtaba Xomanaiy xalqqa yo‘llagan murojaatida mamlakat AQSH va Isroil bilan davom etayotgan qarama-qarshiliklarda g‘alabaga erishganini ma’lum qildi. Bu haqda Zamin.uz xabar berdi.
Uning qayd etishicha, Eron ayni damda uchinchi muqaddas mudofaa deb nomlangan bosqichdan muvaffaqiyatli o‘tgan. Xomanaiy bugungi vaziyatni tahlil qilar ekan, bu epik kurashda Eron xalqi o‘z maqsadiga yetganini ta’kidlab o‘tdi.
Eron tomoni urushni istamasligini, ammo o‘zining milliy huquq va manfaatlaridan hech qachon voz kechmasligini bildirdi. Xususan, Hormuz bo‘g‘ozi ustidan nazoratni yanada kuchaytirish va bu hududdagi strategik siyosatni yangi bosqichga ko‘tarish masalasi kun tartibiga qo‘yildi.
Mojtaba Xomanaiy AQSH va Isroil tomonidan yetkazilgan moddiy hamda ma’naviy zararlar uchun to‘liq tovon talab qilinishini, har bir to‘kilgan qon va ko‘rilgan talafot uchun javobgarlik muqarrar ekanini alohida qayd etdi. U o‘z otasi va mamlakat ozodligi yo‘lida halok bo‘lganlarning qasosi olinishiga qat’iy va’da berdi.
Shu bilan birga, Fors ko‘rfazi davlatlarini tashqi kuchlarning ta’siriga berilmaslikka va ehtiyotkor bo‘lishga chaqirdi. Ayni paytda xalqaro maydonda vaziyat murakkabligicha qolmoqda.
AQSH prezidenti Donald Tramp Eron bilan vaqtinchalik o‘t ochishni to‘xtatish bo‘yicha kelishuvga erishilganini e’lon qildi, biroq muzokaralar muvaffaqiyatsizlikka uchrasa, jiddiy oqibatlar yuzaga kelishidan ogohlantirdi. Ma’lumotlarga ko‘ra, ushbu kelishuvga erishishda Mojtaba Xomanaiyning shaxsiy roli katta bo‘lgan va aynan uning roziligi bilan vaqtinchalik tanaffus e’lon qilingan.
Shunga qaramay, hududdagi ziddiyatlar to‘liq barham topgani yo‘q. Isroil tomoni sulhga qaramasdan, Livanning Bayrut shahriga havo zarbalari berganini ma’lum qildi.
Rasmiy Tel-Aviv bu hujumlar Hizbulloh guruhiga qarshi qaratilganini ta’kidlamoqda. Ushbu voqealardan so‘ng Eron Hormuz bo‘g‘ozi orqali kemalar harakatini cheklab qo‘ydi va faqat Tehron ruxsat bergan kemalargina o‘tish huquqiga ega bo‘lmoqda.
Eron parlamenti esa sulh shartlari buzilganini ta’kidlab, mintaqadagi vaziyat yana keskinlashganidan xavotir bildirmoqda.
