Qirgiziston chegarasida ikki harbiy xizmatchi o‘z joniga qasd qildi
Joriy yilning 7 aprel kuni Qirg‘izistonning O‘sh viloyatida joylashgan Irkeshtam chegara postida ko‘ngilsiz hodisa yuz berdi. Bu haqda Zamin.uz xabar berdi.
Ikki yigirma yoshli harbiy xizmatchi o‘z joniga qasd qilishga uringani haqida xabarlar tarqaldi. Ushbu holat yuzasidan tegishli organlar tomonidan surishtiruv ishlari boshlab yuborilgan.
Ma’lumotlarga ko‘ra, shartnoma asosida xizmat qilayotgan harbiy xizmatchi bosh qismidan jarohat olgan holda Nura qishlog‘idagi tibbiyot muassasasiga olib kelingan. U yerda shoshilinch yordam ko‘rsatilgach, bemor tuman markazi bo‘lgan Gulcha shahridagi shifoxonaga zudlik bilan ko‘chirilgan.
Shifokor Doyirbek Qodirovning qayd etishicha, o‘shlik mutaxassislar ishtirokida chegarachida murakkab jarrohlik amaliyoti o‘tkazilgan. Dastlabki tekshiruvlar o‘q jag‘ qismiga tegib, ko‘z atrofidagi qon tomirlari yaqinidan chiqib ketganini ko‘rsatgan.
Ayni paytda bemor koma holatida bo‘lib, sun’iy nafas olish apparatiga ulangan. Shifokorlar uning ahvolini o‘ta og‘ir deb baholamoqda.
Mazkur holat yuzasidan tegishli ekspertizalar tayinlanib, harbiy prokuratura tomonidan tergov harakatlari olib borilmoqda. Davlat chegara xizmati bergan ma’lumotga ko‘ra, harbiy xizmatchi I.A.
o‘ziga biriktirilgan AK-74 avtomatidan o‘q uzgan. Hozirda ushbu mudhish voqeaning sabablarini aniqlash maqsadida xizmat tekshiruvi ham tashkil etilgan.
Voqea joyidagi holatlar va harbiy xizmatchining ruhiy holati ham o‘rganilmoqda. Rasmiy idoralar tergov yakunlari bo‘yicha qo‘shimcha ma’lumot berilishini ma’lum qilgan.
