Niderlandiyada mashhur mushketyor dArtanyanning qoldiqlari topilgan bo‘lishi mumkin
Niderlandiyaning Maastrixt shahrida joylashgan Muqaddas Pyotr va Pavel cherkovida olib borilgan ta’mirlash ishlari davomida tarix uchun juda muhim bo‘lishi mumkin bo‘lgan topilma aniqlandi. Bu haqda Zamin.uz xabar berdi.
Mutaxassislar cherkov polining cho‘kib ketishi oqibatida boshlangan qazishmalar chog‘ida inson skeletini topishdi. Dastlabki o‘rganishlar va tarixiy ma’lumotlar ushbu qoldiqlar mashhur fransuz mushketyori d’Artanyanga tegishli bo‘lishi mumkinligini ko‘rsatmoqda.
Qoldiqlar yonidan o‘sha davrga oid fransuz tangasining topilishi dafn etilgan shaxs oddiy inson emas, balki jamiyatda yuqori martabaga ega bo‘lgan shaxs bo‘lganidan dalolat beradi. Tarixiy hujjatlarda d’Artanyan 1673 yilda Maastrixt qamali paytida halok bo‘lgani va aynan shu hududda dafn etilgani haqida ma’lumotlar uchraydi.
Ushbu faktlar tadqiqotchilarni topilma haqiqatan ham mashhur qahramonga tegishli bo‘lishi mumkin degan xulosaga yetaklamoqda. Ayni damda olimlar topilgan jag‘ suyaklaridan olingan DNK namunalarini zamonaviy laboratoriya sharoitida chuqur tahlil qilmoqdalar.
Tadqiqotchilar bu qoldiqlar d’Artanyanga tegishli bo‘lishi ehtimolini yuqori baholashmoqda, biroq yakuniy va aniq xulosa faqat genetik tahlil natijalari tayyor bo‘lgandan so‘nggina e’lon qilinadi. Agar ushbu taxmin o‘z tasdig‘ini topsa, bu tarixiy voqea jahon madaniyati va adabiyoti uchun katta ahamiyat kasb etadi.
Olimlar jarayonni diqqat bilan kuzatmoqda va yaqin vaqt ichida jamoatchilikni yangi ma’lumotlar bilan xabardor qilishni rejalashtirmoqda.
