Donald Tramp Eron energetika tizimini butunlay ishdan chiqarish bilan tahdid qildi
AQSH prezidenti Donald Tramp Eron davlatiga nisbatan keskin bayonotlar bilan chiqdi. Bu haqda Zamin.uz xabar berdi.
U Fox News telekanaliga bergan intervyusida Eronning elektr infratuzilmasiga zarba berish orqali mamlakatni uzoq muddatga elektr energiyasidan mahrum qilish imkoniyati mavjudligini taʼkidladi. Trampning so‘zlariga ko‘ra, bunday hujum amalga oshirilgan taqdirda, Eron energetika tizimi jiddiy zarar ko‘radi va davlat o‘n yil davomida elektr taʼminotisiz qolishi mumkin.
Amerika rahbari bu jarayon Eron uchun juda og‘ir iqtisodiy va texnik yo‘qotishlarga sabab bo‘lishini, mamlakat o‘z infratuzilmasini qaytadan barpo etishga majbur bo‘lishini qayd etdi. Shuningdek, AQSH prezidenti Eron hududidagi strategik ahamiyatga ega bo‘lgan obyektlar, jumladan, ko‘priklar ham nishonga olinishi mumkinligini ochiq aytdi.
Ayni damda ikki davlat o‘rtasidagi diplomatik munosabatlar murakkabligicha qolmoqda. Yaqinda Islomobod shahrida AQSH va Eron vakillari o‘rtasida yashirin muzokaralar bo‘lib o‘tgani maʼlum bo‘ldi.
AQSH delegatsiyasiga vitse-prezident Jey Di Vens, maxsus vakil Stiv Uitkoff hamda Jared Kushner boshchilik qilgan bo‘lsa, Eron tomonidan parlament raisi Muhammad Boqir G‘olibof va tashqi ishlar vaziri Abbos Aroqchi ishtirok etdi. Muzokaralar yakunida AQSH tomoni Eron yadro quroli yaratish dasturidan voz kechishga tayyor emasligini va qo‘yilgan shartlarni qabul qilmaganini maʼlum qildi.
Eron tashqi ishlar vazirligi esa ayrim masalalarda kelishmovchiliklar borligini tan olgan holda, muloqotni davom ettirishdan umidvor ekanini bildirdi. Hozirgi kunda mintaqadagi vaziyat juda tarangligicha qolmoqda va tomonlar o‘rtasidagi siyosiy ziddiyatlar yanada kuchayishi xavfi saqlanib turibdi.
Xalqaro hamjamiyat mazkur mojaroning rivojlanishini diqqat bilan kuzatmoqda.
