Qozogistonda bino bezagi tushib uch yoshli bola jarohatlandi

Qozog'istonning Qarag'andi viloyatida fojiali hodisa yuz berdi. Bu haqda Zamin.uz xabar berdi.

Madaniyat uyi binosining tashqi bezagi uchun ishlatilgan qoplama plita tushib ketishi oqibatida uch yoshli bola jarohat oldi. Plita bolaning bosh qismiga tegganligi sababli, u og'ir ahvolda shifoxonaga yotqizildi va hozirda sun'iy koma holatida qolmoqda.

Ma'lum bo'lishicha, voqea bola otasi bilan bino yonida sayr qilayotgan vaqtda sodir bo'lgan. Ota farzandini himoya qilishga harakat qilib, tushayotgan plita bo'lagidan uni to'sib qolishga ulgurgan.

Bolaning onasi shifokorlar tezkor harakatlari tufayli farzandining hayoti saqlab qolinganini ta'kidladi, biroq bola juda ko'p qon yo'qotgan. Jarohatlangan bolaga murakkab jarrohlik amaliyoti o'tkazilib, bosh suyagining bir qismi olib tashlandi.

Bolaning ota onasi bino fasadidagi materiallar sifatsiz va mustahkam o'rnatilmaganini aytib, mas'ullarni javobgarlikka tortishni talab qilishmoqda. Onasining so'zlariga ko'ra, tushgan plita bo'laklarida sement, maxsus ko'pik yoki mixlar mavjud bo'lmagan.

Bu esa qurilish ishlarining juda yomon darajada bajarilganidan dalolat beradi. Oila barcha shunga o'xshash binolar tekshirilishini va aybdorlar jazolanishini istamoqda.

Madaniyat uyi binosi to'rt yil oldin ta'mirlangan, biroq 2024 yilda unda darzlar va turli nuqsonlar aniqlangan. Bino rahbari Meyirlan Qali pudratchi kompaniya bilan bog'lanishganini, lekin ular va'dalarini bajarmaganini ma'lum qildi.

Keyinchalik ushbu ishni bajargan Aziya Nur 2030 nomli kompaniyaning bankrot bo'lganligi aniqlangan. Hozirgi kunda ushbu voqea yuzasidan jinoiy ish qo'zg'atilgan.

Huquqni muhofaza qilish organlari pudratchi kompaniya vakillarini qidiruvga bergan. Tergov davom etmoqda.