Neapol shahrida bankka bostirib kirganlar insonlarni garovga olishdi

Italiyaning Neapol shahrida 16 aprel kuni kutilmagan va shovqinli jinoyat sodir bo‘ldi. Bu haqda Zamin.uz xabar berdi.

Qurollangan guruh bank filialiga bostirib kirgan holda xodimlar va mijozlarni garovga olgan. Jinoyatchilar voqea joyidan yerosti yo‘llari orqali qochib ketgani ma’lum bo‘ldi.

Dastlabki ma’lumotlarga ko‘ra, bosqinchilar bankka kirgan zahoti vaziyatni nazoratga olgan va jami 25 nafar insonni garovda ushlab turgan. Voqea haqida xabar olgan politsiya xodimlari tezkorlik bilan yetib kelib, binoni o‘rab oldi.

Xavfsizlik choralarini kuchaytirish maqsadida atrof qilingan hudud va yo‘llar to‘liq yopildi. Taxminan ikki soat davom etgan muzokaralardan so‘ng barcha garovdagilar ozod qilindi.

Ba’zi fuqarolar kuchli hayajon va stress holatiga tushgani sababli ularga tez tibbiy yordam ko‘rsatildi, biroq jiddiy jarohatlar qayd etilmadi. Maxsus xizmatlar binoga bostirib kirganida, jinoyatchilar allaqachon g‘oyib bo‘lgan edi.

Keyinchalik o‘tkazilgan tekshiruvlar natijasida bosqinchilar oldindan tayyorlangan maxfiy yo‘l, ya’ni kanalizatsiya tizimiga ulanadigan tunnel orqali qochganligi aniqlandi. Guvohlarning so‘zlariga ko‘ra, qurollangan guruh garovdagilarga jismoniy zarar yetkazmagan, ammo ularni alohida xonaga qamab qo‘ygan.

Bu holat jinoyatning puxta rejalashtirilganini ko‘rsatmoqda. Favqulodda xizmatlar bank oynalarini sindirib, ichkaridagi insonlarni xavfsiz joyga olib chiqdi.

Voqeani minglab odamlar jonli efirlar orqali kuzatishdi. Hozirgi vaqtda politsiya yerosti tarmoqlari bo‘ylab keng ko‘lamli qidiruv ishlarini olib bormoqda.

Jinoyatchilar bankdan qancha mablag‘ yoki qimmatbaho buyumlar o‘marib ketgani hali aniq emas. Mazkur voqea Italiyada xavfsizlik tizimi va banklarning muhofaza darajasi borasidagi muammolarni yana bir bor yuzaga chiqardi.