Eron Hormuz bo'g'ozini tijorat kemalari uchun qayta ochdi

Eron hukumati Hormuz bo'g'ozi orqali kemalar harakatini qayta tiklashga qaror qilgani haqida rasmiy bayonot berdi. Bu haqda Zamin.uz xabar berdi.

Mamlakat Tashqi ishlar vazirligi tomonidan tarqatilgan ma'lumotlarga ko'ra, Livanda sulh o'rnatilgani munosabati bilan ushbu strategik dengiz yo'lagi tijorat kemalari uchun vaqtincha to'liq ochildi. Rasmiy xabarda ta'kidlanishicha, bo'g'ozdan faqat tijorat maqsadida harakatlanayotgan kemalarga o'tishga ruxsat beriladi.

Harbiy maqsadli kemalar esa ushbu hududga kiritilmaydi. Shuningdek, o'tishga ruxsat etilishi uchun kemalar va ulardagi yuklar dushman davlatlar bilan bog'liq bo'lmasligi shart qilib qo'yilgan.

Yana bir muhim talabga ko'ra, barcha kemalar Eron tomoni tomonidan belgilangan maxsus yo'nalish orqali harakatlanishi lozim. Shu bilan birga, o'tish jarayoni mas'ul Eron xizmatlari bilan oldindan kelishilgan holda amalga oshirilishi kerakligi aytildi.

Ushbu qaror va bo'g'ozning ochilishi jahon neft bozoriga darhol ta'sir ko'rsatdi va neft narxlarining keskin pasayishi kuzatildi. Ayrim xalqaro manbalarning ma'lum qilishicha, Amerika Qo'shma Shtatlari prezidenti Donald Tramp ham ushbu qadamni ijobiy baholagan va Eronga minnatdorchilik bildirgan.

Ushbu chora dunyo iqtisodiyoti uchun muhim ahamiyatga ega bo'lib, xalqaro savdo yo'llarining barqarorligini ta'minlashga qaratilgan deb baholanmoqda.