Viktoriya Bonyaning murojaati Kremlda katta aks sado berdi
Rossiyalik mashhur bloger Viktoriya Bonyaning prezident Vladimir Putinga yo‘llagan ochiq murojaati katta shov shumkinlik uyg‘otdi. Bu haqda Zamin.uz xabar berdi.
Ushbu murojaat nafaqat oddiy aholi, balki davlatning yuqori martabali rahbarlari orasida ham jiddiy muhokamalarga sabab bo‘ldi. Rossiya prezidentining matbuot kotibi Dmitriy Peskov ushbu masala yuzasidan rasmiy izoh berdi.
U bloger tomonidan ko‘tarilgan muammolar jamiyatda katta aks sado berganini tan oldi. Peskovning ta’kidlashicha, aytib o‘tilgan yo‘nalishlarda hozirda keng ko‘lamli ishlar olib borilmoqda va mutaxassislar jalb etilgan.
Shuningdek, hech bir murojaat e’tiborsiz qoldirilmasligi haqida ishontirdi. Rasmiy javobdan so‘ng Viktoriya Bonya ijtimoiy tarmoqlarda yangi video lavha e’lon qildi.
Unda u o‘z muammolariga e’tibor qaratilgani uchun minnatdorchilik bildirdi. Bloger o‘z xavfsizligi borasida xavotirlari borligini tan olgan bo‘lsa da, xalqning dardini yetkaza olgani uchun mamnunligini izhor etdi.
Xabarlarga ko‘ra, Rossiya prezidenti administratsiyasi ayrim ommaviy axborot vositalariga ushbu mavzuni keng yoritmaslik haqida ko‘rsatma bergan. Matbuotga faqat rasmiy shaxslarning bayonotlarini nashr etish tavsiya qilingan.
Eslatib o‘tamiz, bloger o‘z murojaatida gubernatorlar tomonidan yashirilayotgan beshta asosiy muammoni sanab o‘tgan edi. Bularga Dog‘istondagi suv toshqinlari, Anapadagi ekologik muammolar, noyob hayvonlarning noqonuniy o‘ldirilishi, Novosibirskdagi chorvachilik bilan bog‘liq inqiroz hamda internet cheklovlari kiradi.
Ushbu video ijtimoiy tarmoqlarda millionlab ko‘rishlar va minglab ulashishlar soniga erishdi. Viktoriya Bonyaning bu qadami boshqa mashhurlarni ham ruhlantirdi.
Bloger Ayza va aktyor Ivan Oxlobistin kabi shaxslar ham mamlakatdagi internet cheklovlarini tanqid qilib, buni katta xato deb baholadilar. Ushbu voqealar jamiyatda mashhur shaxslarning ijtimoiy faolligi muammolarni hal qilishda qanchalik samarali ekanligi haqidagi bahslarni kuchaytirdi.
