Quyoshda so‘nggi yillardagi eng xavfli faollik markazi aniqlandi
Quyoshning ko‘rinmas tomonida ulkan qora dog‘lar turkumi shakllangani astronomlar e’tiborini tortdi. Bu haqda Zamin.uz xabar berdi.
Quyosh astronomiyasi laboratoriyasi bergan ma’lumotlarga ko‘ra, so‘nggi yillardagi eng xavfli faollik markazlaridan biri Solar Orbiter kosmik apparati yordamida aniqlandi. Mutaxassislarning ta’kidlashicha, oxirgi bir yil davomida Quyosh yuzasida bunday ko‘lamdagi yirik faollik sohasi deyarli kuzatilmagan edi.
Hajmi va Quyosh diskidagi joylashuvi jihatidan ushbu yangi markaz 2024-yilning may oyida qayd etilgan mashhur 3664-raqamli hududga juda o‘xshashdir. Eslatib o‘tamiz, o‘sha davrda yuz bergan kuchli chaqnashlar va ularning sayyoramizga ta’siri natijasida so‘nggi yigirma yillikdagi eng kuchli magnit bo‘roni sodir bo‘lgan edi.
Tarixiy ma’lumotlar shuni ko‘rsatadiki, eng shiddatli quyosh chaqnashlari aynan mana shunday ulkan faollik hududlarida yuzaga keladi. Quyosh o‘z o‘qi atrofida to‘liq aylanishni taxminan to‘rt hafta ichida amalga oshiradi.
Olimlarning hisob-kitoblariga ko‘ra, taxminan bir haftadan keyin ushbu xavfli soha Quyoshning chap chetida ko‘rina boshlaydi. Shundan so‘ng yana bir hafta o‘tgach, u Yerga nisbatan eng xavfli va to‘g‘ridan-to‘g‘ri ta’sir ko‘rsatadigan nuqtaga yetib kelishi kutilmoqda.
Biroq mutaxassislar ikki haftalik muddat Quyoshdagi jarayonlar uchun juda uzoq vaqt ekanini ta’kidlamoqda. Bu vaqt mobaynida qora dog‘lar yanada kengayishi, kuchli energiya ajratib chiqarishi yoki aksincha, butunlay parchalanib yo‘q bo‘lib ketishi mumkin.
Shu sababli, mazkur dog‘lar guruhining kelajakdagi ta’siri va Yer uchun qanchalik xavfli bo‘lishi borasida hozircha aniq bir to‘xtamga kelish qiyin. Kuzatuvlar davom ettirilmoqda.
