Rustam Nabiyev faqat qo‘llari yordamida Everest cho‘qqisini zabt etdi
Rustam Nabiyev inson irodasi, matonati va bukilmas azmi qanday natijalarga olib kelishini butun dunyoga isbotlagan shaxs sifatida tarix sahifalaridan joy oldi. Bu haqda Zamin.uz xabar berdi.
U sayyoramizning eng baland nuqtasi hisoblangan, dengiz sathidan 8848 metr balandlikda joylashgan Everest cho‘qqisini faqat qo‘llari yordamida zabt etgan kam sonli insonlardan biriga aylandi. Uning bu jasorati nafaqat sport olamida, balki insoniyatning imkoniyatlari cheksiz ekanligini ko‘rsatuvchi yuksak namuna sifatida e’tirof etilmoqda.
Rustam Nabiyevning hayot yo‘li oson kechmagan. 2015-yilda Omsk shahrida harbiy kazarma binosining qulashi oqibatida u og‘ir jarohat olib, har ikki oyog‘idan ayrilgan edi.
Bunday fojia ko‘pchilikni tushkunlikka tushirishi mumkin bo‘lsa-da, Rustam taslim bo‘lmadi. U hayotga bo‘lgan muhabbatini yo‘qotmadi, aksincha, o‘z oldiga ulkan maqsadlarni qo‘yib, alpinizm bilan jiddiy shug‘ullana boshladi.
Dunyoning eng baland cho‘qqilarini zabt etish uning asosiy maqsadiga aylandi va u bu yo‘lda tinimsiz mehnat qildi. Everest cho‘qqisiga ko‘tarilish jarayoni nihoyatda murakkab va xavfli kechdi.
Bir haftadan ortiq davom etgan ushbu mashaqqatli yo‘lda u muzliklar, tik qoyalar va o‘ta og‘ir tabiiy sharoitlar bilan kurashishiga to‘g‘ri keldi. Ayniqsa, 8400 metr balandlikdan yuqorida joylashgan va alpinistlar orasida o‘lim zonasi deb ataladigan hududni bosib o‘tish haqiqiy qahramonlik bo‘ldi.
Bu yerda kislorod yetishmovchiligi va keskin o‘zgaruvchan ob-havo har qanday sog‘lom inson uchun ham katta xavf tug‘diradi. Biroq Rustam faqat qo‘llari yordamida harakatlanib, bu to‘siqlarni mardona yengib o‘tdi.
Barcha qiyinchiliklar va jismoniy charchoqlarga qaramay, 20-may kuni Rustam Nabiyev Everest cho‘qqisiga yetib bordi. Uning bu muvaffaqiyati inson irodasining naqadar qudratli ekanligidan dalolat beradi.
Mazkur yutuq butun dunyo bo‘ylab millionlab insonlar uchun ilhom manbai bo‘lib xizmat qilmoqda. Rustam Nabiyev o‘z harakati bilan jismoniy imkoniyati cheklangan bo‘lishiga qaramay, inson o‘z oldiga aniq maqsad qo‘ysa, eng baland cho‘qqilarni ham zabt etishi mumkinligini amalda ko‘rsatib berdi.
