Xitoydagi ko‘mir konida yuz bergan portlashda 90 kishi halok bo‘ldi

Osiyoning eng yirik davlatlaridan biri hisoblangan Xitoy Xalq Respublikasidan mudhish xabar keldi. Bu haqda Zamin.uz xabar berdi.

Mamlakatning Shansi viloyatida joylashgan ko‘mir konlaridan birida kuchli portlash sodir bo‘ldi. So‘nggi ma’lumotlarga ko‘ra, ushbu hodisa oqibatida kamida 90 nafar konchi bevaqt hayotdan ko‘z yumdi.

Bu haqda Xitoy mahalliy ommaviy axborot vositalari tarqatgan bayonotga tayanib, Buyuk Britaniyaning mashhur BBC axborot agentligi xabar bermoqda. Ushbu yirik fojia Tongzhou Group kompaniyasi tasarrufidagi Liushenyu ko‘mir konida, joriy yilning 22-may kuni mahalliy vaqt bilan soat 19:29 da yuz bergan.

Yer ostida portlash sodir bo‘lgan ayni o‘sha xavfli daqiqalarda kon ichida 247 nafar ishchi o‘z xizmat vazifasini bajarayotgan edi. Mudhish hodisadan so‘ng zudlik bilan voqea joyiga yuzlab tajribali qutqaruvchilar va maxsus texnikalar safarbar etildi.

Xitoy davlat telekanallari namoyish etgan lavhalarda shifokorlar va tibbiyot xodimlari tutun ichidan jarohatlangan konchilarni olib chiqayotgani, hududda o‘nlab tez yordam mashinalari shay turganini ko‘rish mumkin. Rasmiy xabarlarga ko‘ra, turli darajadagi og‘ir kuyish va jarohat olgan yuzdan ortiq kishi zudlik bilan shifoxonalarga yotqizilgan.

Xitoy rahbari Si Szinpin yuz bergan fojia yuzasidan tezkor bayonot berib, vayronalar ostida qolgan odamlarni qidirib topish hamda jabrlanganlarga yordam ko‘rsatish uchun davlatning barcha kuchlarini ishga solishni buyurdi. Xitoy rahbari, shuningdek, portlash sabablarini sinchkovlik bilan o‘rganish va mazkur ko‘ngilsizlikka sababchi bo‘lgan aybdorlarni qonun oldida javobgarlikka tortish bo‘yicha ko‘rsatma berdi.

Mahalliy matbuotning yozishicha, voqea yuzasidan jinoiy ish ochilib, kon rahbariyati hamda xavfsizlik texnikasiga mas’ul bo‘lgan shaxslar huquq-tartibot idoralari tomonidan qo‘lga olingan. Garchi portlashning aniq sabablari maxsus komissiya tomonidan o‘rganilayotgan bo‘lsa-da, dastlabki tahlillarda kon ichidagi metan gazi miqdori me’yordan oshib ketgani falokatga sabab bo‘lgani aytilmoqda.

Eslatib o‘tish joizki, 2000-yillarning boshlarida Xitoy ko‘mir sanoatida bu kabi dahshatli halokatlar tez-tez sodir bo‘lib turardi. Keyinchalik davlat darajasida nazorat kuchaytirilib, xavfsizlik qoidalari qat’iylashtirilgan bo‘lsa-da, tizimdagi kamchiliklar tufayli bunday ayanchli fojialar hamon takrorlanib turibdi.

Hozirda voqea joyida qutqaruv ishlari davom ettirilmoqda.