Italiya Yevropa Ittifoqidan Isroil vaziriga sanksiya qo‘llashni so‘radi
Yaqin Sharqdagi qurolli toqunashuvlar va inson huquqlari poymol etilishi oqibatida yuzaga kelayotgan geosiyosiy inqiroz Yevropa Ittifoqi chegaralariga qadar yetib keldi. Bu haqda Zamin.uz xabar berdi.
Italiya hukumati xalqaro huquq meyorlarini chetlab o‘tib, insoniylikka zid harakatlarni amalga oshirgan Isroil Milliy xavfsizlik vaziri Itamar Ben-Gvirga nisbatan keskin iqtisodiy va siyosiy cheklovlar joriy etish tashabbusi bilan Yevropa Ittifoqiga rasmiy murojaat yo‘lladi. Italiya Tashqi ishlar vaziri Antonio Tayani mazkur jiddiy vaziyat yuzasidan bayonot berib, mamlakat rahbariyati nomidan Yevropa Ittifoqi oliy vakili Kaya Kallasdan vazir Ben-Gvirga qarshi sanksiyalar masalasini zudlik bilan kun tartibiga kiritishni talab qildi.
Bunga vazirning insonparvarlik yordami olib ketayotgan kemalar karvoniga nisbatan amalga oshirgan nomaqbul harakatlari sabab bo‘lgan. Xususan, ochiq dengizda, ya’ni xalqaro suvlar hududida tinchlik faollariga nisbatan kuch ishlatilgani hamda ularning vahshiyona ta’qib qilinishi inson huquqlarining qo‘pol ravishda buzilishi deb baholanmoqda.
Xalqaro hamjamiyatning keskin noroziligiga sabab bo‘lgan yana bir jihat shundaki, Isroil Milliy xavfsizlik vaziri Itamar Ben-Gvirning o‘zi ijtimoiy tarmoqlarda e’lon qilgan videotasvirlarda dahshatli manzaralar aks etgan. Unda ochlik va urush tufayli gumanitar halokat yoqasiga kelib qolgan G‘azo sektori aholisiga tibbiy yordam va oziq-ovqat yetkazishni maqsad qilgan Sumud flotiliyasi faollari kamsitilgani ko‘rinadi.
Videoda vazirning hatto ayollarga nisbatan ham qo‘pollik bilan jismoniy kuch ishlatgani muhrlangan. Voqea tafsilotlariga ko‘ra, joriy yilning may oyida Turkiyaning Marmaris portidan yo‘lga chiqqan insonparvarlik karvoni Isroil harbiy kuchlari tomonidan xalqaro suvlar hududida to‘xtatilgan.
Isroil harbiylari dunyoning 40 dan ortiq davlatidan kelgan 400 dan ziyod ko‘ngillini hibsga olgan. Mazkur asirlar orasida 32 nafar Italiya fuqarosi borligi Rim rasmiylarining sabr kosasini to‘ldirdi.
Italiyadagi nufuzli siyosiy kuchlar ushbu voqeaga o‘zlarining murosasiz munosabatlarini bildirishmoqda. Ularning ta’kidlashicha, qog‘ozda ittifoqchi hisoblangan mamlakatning bunday harakatlari, ayniqsa, Italiya fuqarolari va parlament a’zolariga nisbatan jismoniy tazyiq o‘tkazilishi xalqaro diplomatik munosabatlarga butunlay zid keladi.
Ushbu vaziyat Yevropa Ittifoqi va Isroil o‘rtasidagi kelgusi aloqalarga jiddiy ta’sir ko‘rsatishi kutilmoqda.
