Eronlik xonanda sakkiz kishi bilan darra jazosiga hukm qilindi
Eronlik xonanda Parastu Ahmadiy va uning jamoasiga mansub sakkiz kishi 74 marta darra urish jazosiga hukm qilindi. Bu haqda Zamin.uz xabar berdi.
Britaniya nashri xabariga ko‘ra, bu jazo xonandaning 2024 yilda bevosita efirda boshiga ro‘mol o‘ramasdan qo‘shiq ijro etgani bilan bog‘liq. Sud jarayonida sudlanuvchilar axloq normalariga zid deb topilgan ijodiy ish tayyorlash va uni tarqatishda aybdor, deb ko‘rsatilgan.
Qum viloyatidagi jinoyat ishlari bo‘yicha sud ularni qamchilash jazosidan tashqari, ikki yil davomida Erondan chiqib ketish huquqidan ham mahrum qildi. Shuningdek, shu muddat ichida musiqa va boshqa ijodiy faoliyat bilan shug‘ullanish taqiqlandi.
Ma’lum qilinishicha, 29 yoshli xonanda 2024 yil dekabr oyida “Vatan yoshlari qonidan” deb tarjima qilinadigan qo‘shiqni ro‘molsiz ijro etgan. Mazkur video ijtimoiy tarmoqlarda tez tarqalgan va keng muhokamaga sabab bo‘lgan.
Video keyinchalik yirik video saytida uch millionga yaqin marta ko‘rilgan. Voqeadan so‘ng Parastu Ahmadiy va bir guruh musiqachilar qisqa vaqtga hibsga olingan, biroq keyin ozodlikka chiqarilgan.
Shu bilan birga, Eron rasmiylari videoning e’lon qilinishi bo‘yicha rasmiy tergov boshlagan. Amerika Qo‘shma Shtatlarida joylashgan Eron inson huquqlari markazi vakili Bahor Ghandihariy bu qaror Eronda inson huquqlari holati hali o‘zgarmaganini ko‘rsatayotganini aytdi.
Advokat Muin Xazaeliy esa ayollar qo‘shiq aytishi, musiqa ijro etishi yoki asar yaratishi Eron qonunlarida jinoyat sifatida belgilanmaganini ta’kidladi.
