Amazon kuryeri talabalar o‘rniga imtihon topshirib uch yilga qamaldi
Buyuk Britaniyada Amazon kuryeri talabalar o‘rniga imtihon topshirgani va o‘quv ishlarini bajarib bergani uchun uch yilga ozodlikdan mahrum etildi. Bu haqda Zamin.uz xabar berdi.
BBC xabariga ko‘ra, 43 yoshli Shahid Adnan bu yo‘l bilan taxminan 3,1 million dollar, ya’ni 2,4 million funt sterling atrofida daromad qilgan. Adnan falsafa doktori ilmiy darajasiga ega bo‘lib, kuryerlik bilan shug‘ullangan.
Shu bilan birga, u talabalarga pul evaziga turli xil noqonuniy yordam ko‘rsatib kelgan. U test sinovlarini yechib bergan, kurs ishlarini yozgan va ba’zi buyurtmalar uchun 18 ming dollargacha haq olgan.
Bu jinoiy sxema 2023 yilda tasodifan ochilgan. Talaba qizlardan biri kurs ishi saqlangan USB xotira qurilmasini o‘qituvchisiga topshirgan.
Qurilmani tekshirish jarayonida o‘qituvchi unda universitet tizimiga kirish uchun foydalanuvchi nomlari va maxfiy so‘zlar ham borligini aniqlagan. Aynan shu ma’lumotlar Adnanga talabalar nomidan tizimga kirish va ularning o‘rniga ishlarni bajarish imkonini bergan.
Tergov davomida politsiya uning uyidan katta miqdorda naqd pul topgan. Bundan tashqari, bank hisobvaraqlarida 3,1 million dollardan ortiq mablag‘ borligi ma’lum bo‘lgan.
Dastlabki ma’lumotlarga ko‘ra, Adnan dunyoning turli davlatlaridagi universitetlarda o‘qiydigan kamida 124 nafar talabaning o‘quv ishlarini bajarib bergan bo‘lishi mumkin. Hozirda bu holat yuzasidan qo‘shimcha surishtiruv ishlari davom etmoqda.
