Vladivostokda erkak o‘smirni lift ichida ayovsiz kaltakladi

Rossiyaning Vladivostok shahrida voyaga yetmagan bolaga nisbatan shafqatsiz hujum sodir bo‘ldi. Bu haqda Zamin.uz xabar berdi.

Ma’lum qilinishicha, bir erkak liftga kirish paytida tasodifan tegib ketgan 14 yoshli o‘smirni ayovsiz kaltaklagan. Bolaning erkakdan bir necha bor uzr so‘raganiga qaramay, hujumchi uni to‘xtatmagan.

Guvohlarning so‘zlariga ko‘ra, voqea avval lift ichida boshlangan, keyin esa tashqaridagi yo‘lakda ham davom etgan. Hodisa paytida o‘smirning 6 yoshli ukasi ham u yerda bo‘lgan.

Kichkina bola katta akasiga nisbatan zo‘ravonlikni ko‘z bilan ko‘rgani voqeaning ruhiy ta’sirini yanada og‘irlashtiradi. Tibbiy ko‘rik natijalariga ko‘ra, jabrlanuvchida bosh miya yopiq jarohati va bosh qismida qon to‘planishi aniqlangan.

Hozirda bola shifokorlar nazoratida bo‘lib turibdi. Oila ushbu holat yuzasidan huquqni muhofaza qiluvchi organlarga murojaat qilishni rejalashtirmoqda.

Hujum qilgan shaxsning kimligi hali aniqlanmagan. Unga nisbatan tegishli choralar ko‘rish va masalani huquqiy bahosini berish uchun tergov ishlari olib borilmoqda.