Vetnamda mushuk o‘g‘irlash va sotish guruhiga barham berildi
Vetnamda huquq-tartibot idoralari tomonidan o‘tkazilgan maxsus tekshiruvlar davomida yuzlab uy hayvoni xavfdan qutqarib olindi. Bu haqda Zamin.uz xabar berdi.
Politsiya mushuklarni o‘g‘irlash va ularni noqonuniy sotish bilan shug‘ullangan guruh faoliyatiga barham berdi. Ma’lum qilinishicha, tekshiruvlar paytida 400 dan ortiq tirik mushuk topilgan.
Shuningdek, muzlatilgan holda saqlanayotgan o‘nlab hayvon jasadlari ham aniqlangan. Bundan tashqari, boshqa bir manzilda o‘nlab mushuk borligi aniqlanib, ular xavfsiz joyga olib chiqilgan.
Tergov jarayonida guruh a’zolari so‘nggi yillarda mamlakat janubiy hududlarida mushuklarni yig‘ib, sotib kelganini tan olgan. Ular hayvonlarni vaqtincha maxsus joylarda saqlab, keyin sotuvchilarga yetkazib bergan.
Hayvonlarni himoya qilish tashkilotlarining ma’lum qilishicha, qutqarilgan mushuklarning bir qismi egalariga qaytarilgan. Biroq og‘ir sharoitda saqlangani uchun ayrim hayvonlarni saqlab qolishning iloji bo‘lmagan.
Mutaxassislar Vetnamda har yili millionlab it va mushuk noqonuniy ushlanib, savdoga chiqarilayotganini aytmoqda. So‘nggi yillarda bu muammoga jamiyat e’tibori ortib bormoqda.
Ayniqsa, yoshlar va uy hayvonlarini boquvchilar bunday holatlarga qarshi keskin munosabat bildirmoqda. Hozirda politsiya ish bo‘yicha surishtiruvlarni davom ettirmoqda.
Huquqni muhofaza qiluvchi organlar yo‘qolgan uy hayvonlari egalarini belgilangan tartibda murojaat qilishga chaqirmoqda.
