Turkiyada O'zbekiston fuqarosini o'ldirganlikda ayblanuvchi umrbod qamaldi
Turkiyada 63 yoshli O‘zbekiston fuqarosi Dinara Alya Urqosimovani o‘ldirganlikda ayblangan Metin Kapusuz og‘irlashtirilgan umrbod qamoq jazosiga hukm qilindi. Bu haqda Zamin.uz xabar berdi.
Ayol jasadini elastik plyonka bilan o‘rab qo‘ygani ham tergovda aniqlangan. Bu haqda Turkiya matbuoti xabar berdi.
Ma’lumotlarga ko‘ra, voqea 2025 yil 21 iyun kuni Chanoqqal’a viloyatining Esenler mahallasida sodir bo‘lgan. Marhumadan uch kun davomida darak bo‘lmagach, uning yaqinlari politsiyaga murojaat qilgan.
Politsiya xodimlari Dinara Alya Urqosimova yashagan manzilga borganda, uy eshigini uning 48 yoshli tanishi Metin Kapusuz ochgan. Tekshiruv paytida massaj xonasidan ayolning jonsiz tanasi topilgan.
Shundan so‘ng Kapusuz voqea joyida ushlanib, hibsga olingan. Tergov yakuniga ko‘ra, gumonlanuvchiga “ayol kishini qasddan o‘ldirish” moddasi bo‘yicha ayblov e’lon qilingan.
2026 yil 12 iyun kuni o‘tgan sud majlisida Metin Kapusuz o‘z aybini rad etgan. U sudda ayolni o‘zi o‘ldirmaganini, faqat vafotidan keyin jasadini o‘raganini va telefonidagi ma’lumotlarni o‘chirganini aytgan.
Biroq sud dalillar va ish materiallarini o‘rganib chiqib, uning aybi to‘liq isbotlangan, degan xulosaga kelgan. Sud hay’ati ayblanuvchiga nisbatan yengillashtiruvchi holatlarni qo‘llamagan va uni og‘irlashtirilgan umrbod ozodlikdan mahrum qilish jazosiga hukm qilgan.
