Indoneziyada kuchli zilzila jiddiy vayronagarchilik keltirdi

Indoneziyada 16 iyun kuni kuchi 6,7 magnitudaga teng kuchli zilzila sodir bo‘ldi. Bu haqda Zamin.uz xabar berdi.

Asosiy yer silkinishidan so‘ng hududda bir necha marta takroriy zilzilalar kuzatildi. Bu haqda xorijiy ommaviy axborot vositalari xabar berdi.

Yerosti tebranishlari Markaziy Sulavesi provinsiyasining ma’muriy markazi Palu shahrida bir daqiqadan ortiq davom etgan kuchli silkinishlarni keltirib chiqardi. Paluda taxminan 400 ming kishi yashaydi.

Dastlabki ma’lumotlarga ko‘ra, zilzila ayrim hududlarda jiddiy shikast yetkazdi. Bir qator binolarda yoriqlar paydo bo‘ldi, Sigi okrugi ma’muriy binosining tom qismi qulab tushdi.

Shuningdek, mahalliy universitet binolaridan biri ham zarar ko‘rdi. Xavfsizlik chorasi sifatida shifoxonalardagi bemorlar, jumladan tomchilab dori yuborilayotgan bemorlar ham tashqariga chiqarildi.

Ularning xavfsiz joyga o‘tkazilgani aytilmoqda. AQSH Geologiya xizmati ma’lumotlariga ko‘ra, zilzila epitsentri Palu shahridan 46 kilometr sharqiy-janubi-sharqda joylashgan.

O‘choq taxminan 10 kilometr chuqurlikda qayd etilgan. Eng kuchli takroriy silkinishlar kuchi 5,2, 5,0 va 4,9 magnitudaga yetdi.

Mahalliy hokimiyat aholini rasmiy ko‘rsatmalarga amal qilishga va ehtiyot choralarini ko‘rishga chaqirdi. Mutaxassislar takroriy yer silkinishlari yana bir necha soat davom etishi mumkinligidan ogohlantirmoqda.

Indoneziya bir nechta yirik seysmik yoriqlar kesishgan hududda joylashgan. Shu sababli mamlakatda zilzilalar va vulqon faolligi tez-tez kuzatiladi.