Sinxayda zilzila natijasida bir kishi halok bo‘lgan, bir necha jarohatlangan
Xitoyning shimoli-g‘arbiy qismidagi Sinxay viloyatida kuchli yer silkinishi qayd etildi. Bu haqda Zamin.uz xabar berdi.
Dastlabki ma’lumotlarga ko‘ra, tabiiy ofat oqibatida kamida bir kishi halok bo‘lgan, bir necha fuqaro esa turli darajada jarohat olgan. Zilzila 16 iyun kuni mahalliy vaqt bilan soat 17:06 atrofida sodir bo‘lgan.
Mutaxassislar yer silkinishi kuchini 6,3 ball deb baholamoqda. Zilzila o‘chog‘i Haysi okrugidagi tog‘li hududda, taxminan 10 kilometr chuqurlikda joylashgani aytilmoqda.
Kuchli tebranishlardan so‘ng zilzila markaziga yaqin hududlardagi ko‘mir konlarida ishlayotgan ishchilar zudlik bilan xavfsiz joylarga olib chiqilgan. Hozirda mas’ul idoralar zarar miqdori, jabrlanganlar soni va vayron bo‘lgan inshootlar ro‘yxatini aniqlash ishlarini davom ettirmoqda.
Qutqaruv xizmatlari vayronalar ostida qolgan bo‘lishi mumkin bo‘lgan odamlarni qidirishga kirishgan. Shu bilan birga, hududda ko‘chki va boshqa ikkilamchi xavflar yuzaga kelish ehtimoli o‘rganilmoqda.
Xitoyning tegishli idoralari favqulodda chora-tadbirlarni ishga tushirgan. Asosiy zilziladan so‘ng bir qator takroriy yer silkinishlari ham kuzatilgan, ulardan eng kuchlisining kuchi 4,9 ballga yetgani aytilmoqda.
