Binance Yevropa Ittifoqidagi mijozlariga xizmat ko'rsatish huquqidan ayrilishi mumkin
Jahon kripto-bozorida kutilmagan va keng muhokamaga sabab bo‘ladigan yangilik paydo bo‘ldi. Bu haqda Zamin.uz xabar berdi.
Dunyodagi eng yirik kripto birjalaridan biri hisoblangan Binance shu yilning iyul oyidan boshlab Yevropa Ittifoqi hududidagi millionlab mijozlariga rasmiy ravishda xizmat ko‘rsatish huquqidan mahrum bo‘lishi mumkin. Reuters axborot agentligi vaziyatdan xabardor manbalarga tayanib, Binance Yevropa Ittifoqida ishlash uchun kerakli litsenziyani olish maqsadida topshirgan arizasidan rad javobini olishi mumkinligini xabar qildi.
Bu qaror qabul qilinsa, birja Yevropa bozorida faoliyatini cheklashga majbur bo‘ladi. Yevropa Ittifoqi kripto aktivlar bozorini tartibga solish uchun MiCA qoidalarini joriy etgan.
Unga ko‘ra, kriptovalyuta xizmatlarini ko‘rsatuvchi tashkilotlar shu yil iyun oyining oxiriga qadar tegishli litsenziyani olishi shart. Binance ushbu talabni bajarish uchun hujjatlarini Gretsiya kapital bozori komissiyasiga topshirgan edi.
Reuters manbalariga ko‘ra, aynan Gretsiya rasmiylari Binance arizasini rad etishi mumkin. Biroq agentlik rad etish sabablarini ochiqlamagan.
Hozircha qaror rasmiy e’lon qilingani yo‘q. Gretsiya kapital bozori komissiyasi bu masala yuzasidan ommaviy axborot vositalariga izoh bermadi.
Binance esa ariza talablarga mos kelishini va rasmiy rad javobi hali olinmaganini ta’kidladi. Shu bois vaziyat hali yakunlangan emas.
Yevropa tartibga soluvchi organlarining yakuniy qarori Binance uchun muhim ahamiyatga ega. Agar litsenziya rad etilsa, bu nafaqat birja, balki butun kripto bozori uchun jiddiy signal bo‘lishi mumkin.
