Polshada rossiyalik rassom Semyon Skrepetskiy o‘q bilan o‘ldirildi

Polshada istiqomat qilib kelgan rossiyalik rassom Semyon Skrepetskiy, haqiqiy ismi Robert Kuzovkov, otib o‘ldirildi. Bu haqda Zamin.uz xabar berdi.

Hodisa Byala-Podlyaska shahrida sodir bo‘lgan. Dastlabki ma’lumotlarga ko‘ra, noma’lum shaxs rassomga avtoturargoh hududida yaqin masofadan bir necha bor o‘q uzgan.

Voqea joyiga yetib kelgan shifokorlar jabrlanuvchini qutqarib qola olmagan. Hodisadan so‘ng huquqni muhofaza qiluvchi organlar keng qamrovli qidiruv ishlarini boshlagan.

Dastlabki tekshiruv ma’lumotlariga ko‘ra, jinoyatda ikki kishi ishtirok etgan bo‘lishi mumkin. Ayrim manbalarda gumonlanuvchilardan biri Belarus fuqarosi ekani va qo‘lga olingani aytilmoqda.

Rasmiy tafsilotlar hali to‘liq e’lon qilinmagan. Semyon Skrepetskiy Vladimir Putin, Aleksandr Lukashenko va boshqa siyosiy rahbarlarga bag‘ishlangan keskin mazmundagi karikaturalari bilan tanilgan edi.

U 2021-yildan beri Polshada yashab kelayotgandi. Rassomning ijodi ko‘proq siyosiy tanqid va ijtimoiy mavzularga qaratilgani bilan e’tiborga tushgandi.