Xitoyda ayol o‘g‘lining sun’iy intellekt nusxasi bilan suhbatlashdi
Xitoyda jamoatchilikni hayratda qoldirgan va shu bilan birga bahsli voqea yuz berdi. Bu haqda Zamin.uz xabar berdi.
80 yoshli ayol bir yil davomida avtohalokatda vafot etgan o‘g‘lining sun’iy intellekt yordamida tayyorlangan raqamli nusxasi bilan muloqot qilib kelgani ma’lum bo‘ldi. Oila a’zolari og‘ir xabarni onaga darhol yetkazish uning ruhiy holatiga og‘ir ta’sir ko‘rsatishi mumkin, deb hisoblagan.
Shu sababli ular marhumning fotosuratlari, videolari va ovoz yozuvlari asosida uning raqamli nusxasini yaratishgan. Yaratilgan dastur erkakning tashqi ko‘rinishini, ovozini, gapirish ohangini va ba’zi xatti-harakatlarini aniq aks ettirgan.
Ayol esa uzoq vaqt davomida bu suhbatni haqiqiy muloqotdek qabul qilib, o‘g‘li bilan avvalgidek gaplashib kelgan. Hozirda bu holat nafaqat texnologiyaning imkoniyatlari, balki uning axloqiy va ruhiy tomonlari bo‘yicha ham keng muhokama qilinmoqda.
Ba’zi kishilar bunday yondashuvni onaga qo‘llab-quvvatlashdek baholasa, boshqalar yaqin kishining vafotini yashirish va uning shaxsiy ma’lumotlaridan foydalanish noto‘g‘ri, deb hisoblamoqda. Mutaxassislar bunday holatlarda oila a’zolari oldindan rozilik olmasdan rasmlar, ovoz yozuvlari va shaxsiy ma’lumotlardan foydalanmasligi, shuningdek, insonlarga ruhiy yordam ko‘rsatish muhimligini ta’kidlamoqda.
