«Begonya Gomes» sudda korrupsiya va mablag‘ o‘zlashtirish uchun javob beradi
EFE axborot agentligi xabariga ko‘ra, Ispaniya Bosh vazirining rafiqasi Begonya Gomes korrupsiya va davlat mablag‘larini o‘zlashtirish ishi bo‘yicha sud oldida javob beradi. Bu haqda Zamin.uz xabar berdi.
Dastlabki sud majlislari yakuniga ko‘ra, sud ayblanuvchiga nisbatan qat’iy ehtiyot choralarini qo‘lladi. Sud Gomesning mamlakatdan chiqib ketish xavfining oldini olish uchun bir qator cheklovlar belgiladi.
Unga Ispaniya hududidan chiqib ketish taqiqlandi. Xorijga chiqish pasporti olib qo‘yildi.
Shuningdek, u har oyda ikki marta tegishli nazorat organlarida ro‘yxatdan o‘tishi shart etildi. Prokuratura bu ishda jiddiy jazo chorasini so‘ramoqda.
Ilgariroq davlat ayblovchisi Gomes uchun 24 yillik qamoq jazosi so‘ragani xabar qilingan edi. Ayblovlar orasida xususiy sektorda korrupsiyaga yo‘l qo‘yish, davlat mablag‘larini o‘zlashtirish, budjet mablag‘larini noto‘g‘ri va maqsadsiz ishlatish hamda o‘z mavqeidan foydalanib qarorlarga noqonuniy ta’sir o‘tkazish bor.
Bu ishda faqat Gomes emas, balki uning sheriklikda ayblanayotgan maslahatchisi Kristina Alvares va yirik biznesmen Xuan Karlos Barrabes ham sud oldida javob beradi. Ish 2024 yil bahorida boshlangan edi.
O‘shanda “Toza qo‘llar” deb ataluvchi jamoat tashkiloti ariza bilan chiqib, Gomesni hukumat shartnomalari va davlat tenderlarini ayrim kompaniyalarga berish uchun o‘zining siyosiy aloqalaridan foydalanganlikda ayblagan edi. Keyinchalik tergov kengaydi.
Ishga Gomesning Madriddagi universitet kafedrasidagi faoliyati, u yerdagi moliyaviy jarayonlar va xodimlarni ishga yollashdagi shubhali holatlar bilan bog‘liq yangi epizodlar ham qo‘shildi. Himoya tomoni Gomesning aybsiz ekanligini ta’kidlamoqda.
Uning advokatlari bu ishda haqiqiy huquqiy asos yo‘qligini, jarayon esa amaldagi Bosh vazirga siyosiy bosim o‘tkazish maqsadida tashkil etilganini aytmoqda.
