Voronejda «Sborka» zavodiga raketali hujum bajarildi, uch kisi jarohatlangan

Voronejdagi “Sborka” zavodiga raketa zarbasi berilgani ma’lum qilindi. Bu haqda Zamin.uz xabar berdi.

Ukraina Qurolli Kuchlari Bosh shtabi obyektga yuqori aniqlikdagi qanotli raketalar bilan hujum uyushtirilganini tasdiqladi. Dastlabki xabarlarga ko‘ra, zarba korxonaning muhim ishlab chiqarish qismlarini nishonga olgan.

Ma’lumotlarga qaraganda, zavod Rossiyada harbiy texnika va raketa tizimlari uchun zarur bo‘lgan elektron komponentlarni ishlab chiqarish bilan shug‘ullangan. U yerda “Iskander” va “Kalibr” raketalarida, radiolokatsiya stansiyalarida hamda S-400 havo mudofaa tizimlarida foydalaniladigan tranzistor, diod va mikrosxemalar tayyorlangan.

Voronej viloyati gubernatori Aleksandr Gusev korxonaning ishlab chiqarish obyekti zarar ko‘rganini bildirdi. Uning so‘zlariga ko‘ra, hujum natijasida uch kishi jarohatlangan.

Hodisa joyida shifokorlar va favqulodda xizmatlar ish olib bormoqda. Ukraina tomoni bu obyekt Rossiya harbiy-sanoat majmuasining muhim bo‘g‘inlaridan biri ekanini ta’kidlamoqda.

Kiyevning bayonotiga ko‘ra, zavodga berilgan zarba Rossiyaning raketa va havo mudofaa tizimlarini ta’minlash imkoniyatlariga salbiy ta’sir ko‘rsatishi mumkin.