Fransiyada samolyot qulab tushib 11 kishi hal bo‘ldi

Fransiyada yana bir yirik aviahalokat sodir bo‘ldi. Bu haqda Zamin.uz xabar berdi.

Mamlakatning Nansi shahri yaqinidagi Tomblen kommunasida parashyutdan sakrash uchun foydalaniladigan yengil samolyotning qulab tushishi oqibatida bortda bo‘lgan 11 kishining barchasi hayotdan o‘tdi. Bu haqda France 24 telekanali xabar tarqatdi.

Ma’lum qilinishicha, fojia 28 iyun kuni mahalliy vaqt bilan soat 11:00 atrofida ro‘y bergan. Samolyot Grand Nancy-Tomblaine aerodromidan havoga ko‘tarilganidan ko‘p o‘tmay, Tomblen shahridagi Salvador Alende ko‘chasida joylashgan turarjoy hududiga qulab tushgan.

Dastlabki ma’lumotlarga ko‘ra, samolyot bortida jami 11 kishi bo‘lgan. Ular orasida bir nafar tajribali uchuvchi, besh nafar parashyut instruktori hamda parashyutdan sakrashni ilk bor sinab ko‘rayotgan besh nafar yo‘lovchi mavjud bo‘lgan.

Halokat oqibatida ularning barchasi voqea joyida vafot etgan. Xabarlarga ko‘ra, halok bo‘lgan yo‘larning aksariyati Nansi shahrida faoliyat yuritgan hamshiralar bo‘lgan.

Ular parashyut bilan sakrash mashg‘ulotida ishtirok etish uchun ushbu reysga chiqqan. Hodisa haqida xabar olinishi bilan voqea joyiga katta kuchlar jalb qilingan.

Qutqaruv ishlarida 50 nafar o‘t o‘chiruvchi, 25 ta maxsus texnika, tez tibbiy yordam brigadalari hamda politsiya xodimlari ishtirok etgan. Hudud to‘liq o‘rab olingan va xavfsizlik choralari kuchaytirilgan.

Fransiya Ichki ishlar vaziri Loran Nyunez hamda Transport vaziri Filipp Tabaro shaxsan voqega yetib borgan. Ular bergan dastlabki ma’lumotlarga ko‘ra, samolyot havoga ko‘tarilganidan bir necha daqiqa o‘tgach, boshqaruvni yo‘qotib, yerga qulagan.

Ayni paytda halokatning aniq sabablarini aniqlash maqsadida rasmiy tergov boshlangan. Fransiyaning Fuqarolik aviatsiyasi xavfsizligini tekshirish byurosi mutaxassislari samolyot qoldiqlarini o‘rganish va texnik ekspertizalar o‘tkazish ishlarini boshlagan.

Dastlabki taxminlarga ko‘ra, fojiaga samolyot dvigatelida yuzaga kelgan texnik nosozlik yoki havo kemasidagi og‘irlik muvozanatining buzilishi sabab bo‘lgan bo‘lishi mumkin. Biroq mutaxassislar tergov yakunlanmaguncha aniq xulosa chiqarishga erta ekanini ta’kidlamoqda.

Fransiya Fuqarolik aviatsiyasi xavfsizligini tekshirish byurosi ma’lumotiga ko‘ra, mazkur halokat harbiy va tijorat aviatsiyasi hisobga olinmagan holda, mamlakat fuqarolik aviatsiyasi tarixida eng ko‘p qurbonlar qayd etilgan aviahalokatlardan biri sifatida baholanmoqda. Tergov natijalari e’lon qilinishi bilan halokatning aniq kelib chiqish sabablari va unga olib kelgan omillar haqida batafsil ma’lumot berilishi kutilmoqda.