AQSHda firibgarlar bir yil ichida 68 milliard dollarni o‘mardi
Amerika Qo‘shma Shtatlarida firibgarlik bilan bog‘liq jinoyatlar misli ko‘rilmagan darajaga yetdi. Bu haqda Zamin.uz xabar berdi.
Gallup tadqiqot kompaniyasi hamda Firibgarlikka chek qo‘yish ittifoqi tomonidan o‘tkazilgan o‘rganishlar natijasiga ko‘ra, amerikaliklar 2025-yil davomida firibgarlar tuzog‘iga tushib, jami 68 milliard dollar mablag‘idan ayrilgan. Mazkur ko‘rsatkich mamlakat tarixidagi eng yirik moliyaviy zarar sifatida qayd etildi.
Bu boradagi ma’lumotlarni NBC telekanali jamoatchilikka e’lon qildi. Tahliliy hisobotda keltirilishicha, bir yil ichida 15 millionga yaqin AQSH fuqarosi, ya’ni mamlakat umumiy aholisining qariyb 6 foizi turli firibgarlik usullari qurboniga aylangan.
Mutaxassislar vaziyatni chuqur tahlil qilib, jabrlanganlarning 12 foizi aynan sun’iy intellekt texnologiyalari yordamida amalga oshirilgan jinoyatlar tufayli zarar ko‘rganini ta’kidlamoqda. Xususan, inson ovozi va qiyofasini soxtalashtiruvchi texnologiyalar, ya’ni dipfeyk usulidagi video hamda audio xabarlar eng xavfli qurolga aylangan.
Shuningdek, yaqin qarindoshlar yoki bank xodimlari nomidan qilingan soxta qo‘ng‘iroqlar hamon eng ko‘p qo‘llanadigan usullar sirasiga kiradi. Tadqiqotchilarning fikricha, sun’iy intellekt imkoniyatlari jinoyatchilarga odamlarning ishonchini osonroq qozonish va ularni chalg‘itish uchun keng yo‘l ochib bermoqda.
Zamonaviy texnologiyalar yordamida yaratilgan soxta kontentni haqiqiysidan ajratish borgan sari qiyinlashib bormoqda. Shu sababli, mutaxassislar hukumatni bunday texnologik tahdidlarga qarshi nazorat choralarini zudlik bilan kuchaytirishga va aholining kiberxavfsizlik borasidagi bilimlarini oshirishga chaqirmoqda.
Aks holda, kelajakda moliyaviy yo‘qotishlar ko‘lami yanada kengayishi mumkin.
