Zelenskiy va Zalujniy ehtimoliy prezidentlik saylovlarini muhokama qildi
Ukraina prezidenti Volodimir Zelenskiy Kiyevda mamlakatning Buyuk Britaniyadagi elchisi hamda Ukraina Qurolli kuchlarining sobiq bosh qo‘mondoni Valeriy Zalujniy bilan yopiq muloqot o‘tkazgani haqida ma’lumotlar tarqaldi. Bu haqda Zamin.uz xabar berdi.
Mahalliy nashrlarning ishonchli manbalariga tayanib xabar berishicha, ushbu uchrashuvda mamlakatda o‘tkazilishi kutilayotgan ehtimoliy prezidentlik saylovlari asosiy muhokama mavzusi bo‘lgan. Muloqot davomida Zalujniy saylov jarayonlarida o‘z nomzodi bilan ishtirok etishga tayyor ekanini ochiq bildirgan.
Valeriy Zalujniy Londondan Kiyevga Buyuk Britaniya hukumatidagi kutilmagan o‘zgarishlar arafasida chaqirilgan. Dastlab uchrashuvda ikki davlat o‘rtasidagi hamkorlik va diplomatik masalalar ko‘rib chiqilgan bo‘lsa-da, keyinchalik suhbat siyosiy maydondagi vaziyatga ko‘chgan.
Zelenskiy frontdagi holat ijobiy tomonga o‘zgarayotganini hamda xalq orasida birlik saqlanib qolayotganini ta’kidlab, kuz oylarida saylov o‘tkazish uchun qulay imkoniyat paydo bo‘lganini qayd etgan. Shu bilan birga, davlat rahbari saylov jarayonlari jamiyatda bo‘linish keltirib chiqarmasligi va raqobat keskinlikka aylanib ketmasligi muhimligini uqtirgan.
Uchrashuvning eng muhim qismida Zelenskiy sobiq bosh qo‘mondonga to‘g‘ridan to‘g‘ri savol bilan yuzlangan. U agar saylovlar joriy yilning kuzida tashkil etilsa, Zalujniy o‘z nomzodini qo‘yish yoki qo‘ymasligi bilan qiziqqan.
Manbalarning tasdiqlashicha, Valeriy Zalujniyning javobi qat’iy bo‘lib, u saylovda qatnashish niyati borligini tasdiqlagan. Shundan so‘ng, prezident unga rejalashtirilgan boshqa lavozimlarni taklif etishdan voz kechgan.
Zalujniy o‘z qarorini siyosiy shuhratga intilish bilan emas, balki xalqning unga bo‘lgan ishonchi va umidi bilan izohlagan. Keyinchalik Zalujniy bilan Ukraina mudofaa vaziri Rustem Umerov hamda hukmron partiya vakillari ham uchrashib, saylovlar davlat barqarorligiga ta’sir qilishi mumkinligi haqida ogohlantirganlar.
Shunga qaramay, sobiq harbiy rahbarning pozitsiyasi o‘zgarishsiz qolgan. Hozirda mamlakatda o‘tkazilayotgan ijtimoiy so‘rovnomalar Zalujniyning reytingi hamon yuqori ekanini ko‘rsatmoqda.
Shu bilan birga, siyosiy maydonda yana bir kuchli nomzod sifatida razvedka boshqarmasi rahbari Kirill Budanovning ham nufuzi ortib borayotgani kuzatilmoqda. Ukrainadagi siyosiy vaziyat yaqin oylarda yanada oydinlashishi kutilmoqda.
