AQSHda to'rt yil davomida qamab saqlangan o'n olti nafar bola qutqarildi
Amerika Qo'shma Shtatlarining Ogayo shtatidagi Hamden qishlog'ida dahshatli voqea yuz berdi. Bu haqda Zamin.uz xabar berdi.
Huquqni muhofaza qilish organlari xodimlari o'tkazgan maxsus tadbir davomida o'ta og'ir va sanitariya talablariga javob bermaydigan sharoitda saqlangan 16 nafar bola qutqarildi. Aniqlanishicha, bolalarning eng kichigi bor-yo'g'i bir yarim yoshda, eng kattasi esa 18 yoshda bo'lgan.
Rasmiy ma'lumotlarga ko'ra, bu bolalar qariyb to'rt yil davomida atigi 12 kvadrat metrli kichik bir xonaga qamab qo'yilgan. Uyning ichi chiqindilarga to'lib ketgan, yashash sharoiti esa inson chidab bo'lmas darajada ayanchli bo'lgan.
Tekshiruvlar natijasida bolalarning aksariyati tashqi dunyodan butunlay uzilib qolgani ma'lum bo'ldi. Ularning ayrimlari hatto gapirishni ham bilmaydi.
Masalan, rivojlanishida nuqsoni bo'lgan 18 yoshli qiz oddiygina o'z ismini yozishdan ham bexabar ekani aniqlandi. Bolalar hech qachon maktabga bormagan va hech qanday ta'lim olmagan.
Mazkur holat yuzasidan bolalarning ota-onasi hamda bobosi va buvisiga nisbatan voyaga yetmaganlarni xavf ostida qoldirish ayblovi bilan 16 ta jinoiy ish qo'zg'atildi. Prokuratura xodimlari bu voqea odam savdosi bilan bog'liq emasligini, balki oila ichidagi ayanchli zo'ravonlik va beparvolik natijasi ekanini ta'kidlamoqda.
Bolalar huquq-tartibot idoralari boshqa bir jinoyat ishi yuzasidan uyda tintuv o'tkazayotgan paytda tasodifan topilgan. Uyda qafaslar aniqlanmagan bo'lsa-da, bolalarning xonadan chiqishi qanday qilib cheklab qo'yilgani hozirda mutaxassislar tomonidan o'rganilmoqda.
Jabrlangan bolalarning yetti nafari darhol shifoxonaga yotqizildi. Yana ikki nafarining ahvoli o'ta og'ir bo'lgani sababli ular maxsus vertolyotda jarohatlar markaziga yetkazildi.
Hozirda ulardan biri sun'iy nafas oldirish apparatiga ulangan holda shifokorlar nazoratida qolmoqda. Tergov ma'lumotlariga ko'ra, ushbu oila yigirma yil davomida shtatning turli hududlariga tez-tez ko'chib yurgan.
Ular shu yo'l bilan bolalarni davlat idoralari va ijtimoiy xizmatlar nazoratidan yashirib kelishgan. Ayni paytda qutqarilgan barcha bolalar davlat qaramog'iga olindi va ularga zaruriy tibbiy hamda psixologik yordam ko'rsatilmoqda.
Ushbu voqea mahalliy jamoatchilik orasida katta rezonans keltirib chiqardi.
