AQSHda to‘rt yil davomida qamab saqlangan o‘n olti bola qutqarildi
Amerika Qo‘shma Shtatlarining Ogayo shtatida kishini larzaga soluvchi mudhish voqea fosh etildi. Bu haqda Zamin.uz xabar berdi.
Hamden qishlog‘idagi tashlandiq va xaroba uylarning birida qariyb to‘rt yil davomida bitta xonaga qamab saqlangan o‘n olti nafar bola qutqarib olindi. Bu haqda xalqaro nashrlar hamda mahalliy huquqni muhofaza qilish organlari xabar bermoqda.
Olingan ma’lumotlarga ko‘ra, yoshi bir yarim yoshdan o‘n sakkiz yoshgacha bo‘lgan ushbu bolalarning barchasi bir oilaga mansubdir. Ular nihoyatda og‘ir va achinarli sharoitlarda hayot kechirgan.
Bolalarning ayrimlari hatto gapirishni ham bilmasligi, o‘n sakkiz yoshli imkoniyati cheklangan qiz esa o‘z ismini yozishdan ham bexabar ekani aniqlangan. Bu holat bolalarning uzoq vaqt davomida tashqi dunyodan butunlay uzilib qolganini ko‘rsatmoqda.
Huquq-tartibot idoralari xodimlari bolalarni mutlaqo boshqa bir jinoyat ishi yuzasidan o‘tkazilgan tintuv jarayonida tasodifan aniqlagan. Mazkur ayanchli voqea yuzasidan bolalarning ota-onasi, shuningdek, ikki nafar buvasi va buvisiga nisbatan voyaga yetmaganlarni xavf ostida qoldirish hamda ularning hayotiga tahdid solish bo‘yicha o‘n oltita banddan iborat ayblov e’lon qilindi.
Qutqarilgan bolalarning bir qismi zudlik bilan shifoxonaga yotqizildi. Ulardan ikki nafari o‘ta og‘ir ahvolda ekani sababli ixtisoslashtirilgan tibbiy markazga yetkazilgan.
Hozirda bir nafar bola sun’iy nafas oldirish apparati yordamida hayot uchun kurashmoqda. Tibbiyot xodimlari ularning jismoniy va ruhiy holatini tiklash uchun barcha choralarni ko‘rmoqda.
Tergov ma’lumotlariga ko‘ra, ushbu oila yillar davomida bolalarni davlat nazoratidan va ijtimoiy xizmatlardan yashirib kelgan. Bolalarning hech biri maktabga bormagan va tibbiy ko‘rikdan o‘tmagan.
Hozirgi vaqtda barcha bolalar davlat himoyasiga olingan bo‘lib, ular bilan psixologlar va ijtimoiy xodimlar ish olib bormoqda. Mazkur holat yuzasidan keng qamrovli tergov harakatlari davom ettirilmoqda.
