Olmaotada o'yinchoq yorilishi oqibatida yosh bola og'ir jarohat oldi
Qozog‘istonning Olmaota shahrida yuz bergan ko‘ngilsiz voqea bolalar uchun mo‘ljallangan ayrim o‘yinchoqlar xavfsizligi masalasini yana bir bor kun tartibiga chiqardi. Bu haqda Zamin.uz xabar berdi.
Stressni kamaytirish maqsadida ishlab chiqarilgan yumshoq o‘yinchoq yorilib ketishi oqibatida yetti yoshli qizaloq og‘ir jarohat oldi. Ma’lum bo‘lishicha, o‘yinchoq ichidagi kimyoviy modda bolaning tanasiga sachrab, uning terisida chuqur kuyish izlarini qoldirgan.
Jabrlangan qizning onasi Asel Pakning so‘zlariga ko‘ra, o‘yinchoq ichidagi quyuq gelsimon suyuqlik tashqariga chiqib, bolaning terisiga yopishib qolgan. Ushbu modda teriga shu qadar qattiq yopishganki, u hatto teri qatlami bilan birga ajralib ketgan.
Voqeadan so‘ng darhol shifokorlarga murojaat qilingan va mutaxassislar qizaloqning yelka hamda qo‘l qismida kimyoviy kuyish jarohati borligini tasdiqlagan. Hozirda bolaning ahvoli nazorat ostiga olingan.
Ayol mahsulot sotib olinganini tasdiqlovchi xarid cheki va barcha tibbiy hujjatlarni saqlab qolganini bildirdi. U mazkur o‘yinchoqning tarkibi va xavfsizligi yuzasidan mustaqil ekspertiza o‘tkazilishini talab qilmoqda.
Dastlabki taxminlarga ko‘ra, hodisaga ommalashgan skvishi turidagi o‘yinchoqning sifatsiz va talablarga javob bermaydigan nusxasi sabab bo‘lgan bo‘lishi mumkin. Bunday mahsulotlar ko‘pincha arzon xomashyodan tayyorlanadi va ularning tarkibidagi moddalar inson salomatligi uchun xavfli hisoblanadi.
Qozog‘iston Sanitariya-epidemiologiya nazorati qo‘mitasi vakillari ushbu holat bo‘yicha munosabat bildirdi. Ularning ta’kidlashicha, stressga qarshi o‘yinchoqlar uchun alohida texnik talablar ishlab chiqilmagan bo‘lsa-da, bozorda sotilayotgan barcha bolalar mahsulotlari umumiy xavfsizlik standartlariga javob berishi va muvofiqlik sertifikatiga ega bo‘lishi shart.
Hozirda hodisa yuzasidan rasmiy tekshiruv ishlari olib borilmoqda. Mutaxassislar ota-onalarni bolalar uchun o‘yinchoq tanlashda o‘ta ehtiyotkor bo‘lishga chaqirmoqda.
Mahsulot sotib olayotganda uning hidi, sifati va kelib chiqishini tasdiqlovchi hujjatlarni so‘rash zarur. Agar jarohat mahsulotdagi nuqson yoki xavfsizlik qoidalariga rioya etilmagani oqibatida kelib chiqqanligi isbotlansa, ishlab chiqaruvchi yoki sotuvchi qonuniy tartibda javobgarlikka tortiladi.
Shuningdek, kichik yoshdagi bolalarni bunday o‘yinchoqlar bilan qarovsiz qoldirmaslik tavsiya etiladi.
