Hindistonga sayohat qilgan ayol o‘n yil davomida parazitdan azob chekdi
Oddiy sayyohlik sayohati sifatida boshlangan safar bir ayolning taqdirini butunlay o‘zgartirib yubordi. Bu haqda Zamin.uz xabar berdi.
Buyuk Britaniya fuqarosi Louri Denman Hindistonga qilgan safaridan so‘ng deyarli o‘n yil davomida og‘ir xastalik bilan kurashishga majbur bo‘lgani haqida so‘zlab berdi. Ma’lum bo‘lishicha, Louri 2007-yilda, yigirma yoshlarida Hindistonga sayohat qilgan edi.
U safar davomida o‘z salomatligiga e’tiborli bo‘lib, turli yuqumli kasalliklarning oldini olish maqsadida faqat o‘simlik mahsulotlaridan tayyorlangan taomlarni iste’mol qilgan. Biroq bunday ehtiyotkorlik ham uni xavfli parazitlar hujumidan asrab qola olmagan.
Oradan to‘rt yil o‘tgach, ayolning organizmidan uzunligi qariyb bir metrga teng bo‘lgan tasmasimon gijja chiqqan. O‘shanda shifokorlar asosiy muammo bartaraf etildi, degan xulosaga kelishgan edi.
Ammo ko‘p o‘tmay ayolda kuchli bosh og‘riqlari, tutqanoq xurujlari va boshqa tashvishli alomatlar paydo bo‘la boshladi. Tibbiy tekshiruvlar natijasida unga neyrotsistiserkoz tashxisi qo‘yildi.
Bu xastalik cho‘chqa tasmasimon qurti lichinkalarining inson miyasiga tushishi va u yerda rivojlanishi natijasida yuzaga keladigan o‘ta xavfli parazitar kasallik hisoblanadi. Shifokorlar o‘tkazgan chuqur tahlillar ayolning miyasida jami 38 ta parazit borligini ko‘rsatdi.
Mutaxassislarning tushuntirishicha, bunday kasallik, odatda, parazit tuxumlari bilan ifloslangan suv yoki oziq-ovqat mahsulotlarini iste’mol qilish, shuningdek, shaxsiy gigiyena qoidalariga yetarli darajada rioya etmaslik oqibatida yuqadi. Davolanish jarayoni Louri uchun nihoyatda og‘ir va mashaqqatli kechdi.
Shifokorlar uning hayotini saqlab qolish uchun dunyoning turli mamlakatlaridagi yetakchi mutaxassislar bilan maslahatlashishga majbur bo‘lishdi. Kuchli dori vositalarining nojo‘ya ta’siri sababli uning tashqi ko‘rinishi o‘zgardi, u avtomobil boshqarish huquqidan mahrum bo‘ldi va hatto sevimli ish faoliyatini ham to‘xtatishga majbur bo‘ldi.
Miyadagi shishlarning qayta-qayta paydo bo‘lishi ayolda kuchli ruhiy tushkunlik va doimiy xavotir hissini uyg‘otdi. Ma’lum muddat u ruhiy salomatlikni tiklash muassasasida ham muolajalar oldi.
Bugungi kunga kelib Louri Denmanning ahvoli ancha yaxshilangan. Uning so‘zlariga ko‘ra, 2017-yildan buyon qo‘llanilayotgan zamonaviy davolash usullari kutilgan samarani berdi va hozirda kasallik asoratlari deyarli sezilmayapti.
Endilikda u o‘z boshidan kechirgan og‘ir sinovlar va sabr-bardosh haqida ko‘p qismli turkum eshittirishlar tayyorlamoqda. Uning asosiy maqsadi shunday og‘ir vaziyatga tushib qolgan insonlarga ruhiy dalda berish va ularning sog‘ayib ketishiga bo‘lgan umidini mustahkamlashdan iboratdir.
