Rossiyada amaldorlar uchun benzin quyishda imtiyozli tartib joriy etildi
Rossiyaning kamida to‘rtta hududida ayrim yoqilg‘i quyish shoxobchalari davlat xizmatchilarining avtomobillariga imtiyozli tartibda benzin berayotgani haqida xabarlar tarqaldi. Bu haqda Zamin.uz xabar berdi.
Mahalliy nashrlar bergan ma’lumotlarga ko‘ra, oddiy haydovchilar yoqilg‘i topish maqsadida uzoq navbatlarda turgan bir vaqtda, amaldorlar va davlat tashkilotlariga qarashli mashinalarga benzin alohida navbat bilan quyib berilmoqda. Xususan, Saratov viloyatida yoqilg‘i sotuviga joriy etilgan cheklovlar iyul oyi o‘rtasiga qadar uzaytirilgan bo‘lib, u yerdagi ayrim shoxobchalar asosan davlat xizmatchilariga xizmat ko‘rsatmoqda.
Mahalliy ommaviy axborot vositalarining qayd etishicha, ushbu imtiyozlar faqat tez tibbiy yordam, politsiya yoki favqulodda xizmatlar bilan cheklanib qolmayapti. Guvohlarning so‘zlariga ko‘ra, tuman hokimligi, davlat xizmatlari markazlari va pochta aloqasi xodimlari hech qanday muammosiz yoqilg‘i olmoqda.
Hatto ayrim hollarda haydovchilar maxsus so‘zlarni aytish orqali benzin xarid qilayotgani haqida ma’lumotlar bor. Shu bilan birga, bir avtomobilga kuniga o‘ttiz litrdan ortiq yoqilg‘i berilmasligi haqidagi umumiy cheklov hamon amalda saqlanib qolmoqda.
Krasnodar va Chelyabinsk kabi shaharlarda ham shunga o‘xshash holatlar kuzatilgan. Deputatlar va jamoatchilik vakillari ijtimoiy tarmoqlarda tarqatgan videolarda yoqilg‘i quyish shoxobchalari xodimlari faqat xizmat guvohnomasini ko‘rsatgan shaxslarga benzin sotayotgani aks etgan.
Oddiy fuqarolarga esa yoqilg‘i tugagani haqida javob berilmoqda. Volgograd viloyatida esa benzin asosan maxsus kartalarga ega bo‘lgan mijozlarga, ya’ni mahalliy ma’muriyat vakillariga sotilayotgani aytilmoqda.
Rossiyadagi bunday yoqilg‘i muammosi neftni qayta ishlash obyektlariga qilinayotgan hujumlar ortidan yanada keskinlashgan. Ko‘plab hududlarda haydovchilar soatlab navbat kutishga majbur bo‘lishmoqda.
Shunga qaramay, mamlakat hukumati rasmiylari ichki bozorda yoqilg‘i taqchilligi yo‘qligini va zaxiralar yetarli ekanini ta’kidlab kelmoqda. Biroq amaldagi vaziyat va aholining shikoyatlari yoqilg‘i ta’minotida jiddiy uzilishlar borligidan dalolat beradi.
