Pokistonda inson a’zolarini noqonuniy sotgan xalqaro jinoiy guruh fosh etildi
Pokistonda inson tugruq yo‘ldoshini noqonuniy ravishda yig‘ish, qayta ishlash va xorijga yuborish bilan shug‘ullangan xalqaro jinoiy guruh faoliyati fosh etildi. Bu haqda Zamin.uz xabar berdi.
Mamlakat Federal tergov agentligi mazkur holat yuzasidan keng ko‘lamli surishtiruv ishlarini boshladi. Tergov jarayonida aniqlangan ma’lumotlarga ko‘ra, mazkur tarmoq a’zolari turli tibbiyot muassasalari bilan kelishgan holda har oyda o‘rtacha 200 kilogramm miqdoridagi inson a’zolarini sotib olib kelgan.
Ular ushbu xomashyoni maxsus sexlarda quritib, qayta ishlagandan so‘ng chet elga eksport qilishni yo‘lga qo‘ygan. Islomobod shahrida o‘tkazilgan tezkor reyd davomida noqonuniy faoliyat yuritayotgan sexdan 500 kilogrammga yaqin tugruq yo‘ldoshi daliliy ashyo sifatida olib qo‘yildi.
Mazkur jinoyatga aloqadorlikda gumon qilinayotgan besh nafar shaxs voqea joyida qo‘lga olindi. Shuningdek, poytaxt xalqaro aeroportida Vetnam davlatiga yuborilishi rejalashtirilgan, og‘irligi 100 kilogramm bo‘lgan shubhali yuk ham to‘xtatib qolindi.
Tekshiruvlar natijasida ushbu yuk tarkibi ham aynan inson to‘qimalaridan iborat ekani tasdiqlandi. Gumonlanuvchilar har bir tugruq yo‘ldoshini shifoxonalardan taxminan 800 rupiy evaziga sotib olganliklari ma’lum bo‘ldi.
Qayta ishlangan mahsulotlardan qarish jarayonini sekinlashtiruvchi qimmatbaho inyeksiyalar tayyorlangan. Qayd etilishicha, tayyor holatdagi bitta bunday dorining narxi bozorda 700 ming rupiygacha yetgan.
Tergovchilar jinoiy tarmoq faoliyati faqat poytaxt bilan cheklanib qolmay, mamlakatning boshqa yirik shaharlariga ham yoyilganini taxmin qilmoqda. Hozirda ayrim shifoxona xodimlari, chiqindilarni utilizatsiya qilish korxonalari va boshqa mas’ul shaxslarning ushbu noqonuniy savdoga aloqadorligi sinchiklab tekshirilmoqda.
Pokiston qonunchiligiga ko‘ra, inson a’zolari yoki to‘qimalarini tijorat maqsadida noqonuniy sotish bilan shug‘ullangan shaxslar o‘n yilgacha ozodlikdan mahrum etilishi va yirik miqdordagi jarimaga tortilishi mumkin. Mutaxassislar tugruq yo‘ldoshini o‘ta xavfli yuqumli tibbiy chiqindi deb hisoblaydi va uni yo‘q qilish qat’iy belgilangan tartib asosida amalga oshirilishi shartligini ta’kidlaydi.
Garchi ayrim doiralarda uning tarkibidagi moddalar yoshartiruvchi xususiyatga ega deb ishonilsa-da, bu boradagi ilmiy asoslar hali ham bahsli bo‘lib qolmoqda.
