Kiyevda raketa hujumi oqibatida o'zbek restorani vayron bo'ldi
Rossiyaning Kiyev shahriga amalga oshirgan navbatdagi raketa hujumi oqibatida poytaxtdagi mashhur O‘zbek palovi birinchi raqamli restorani butunlay vayron bo‘ldi. Bu haqda Zamin.uz xabar berdi.
Bu haqda restoran ma’muriyati ijtimoiy tarmoqlar orqali rasmiy ma’lumot berdi. Qayd etilishicha, mazkur umumiy ovqatlanish maskani Kiyev shahrining Garmatnaya ko‘chasida joylashgan edi.
Hujum oqibatida bino jiddiy zarar ko‘rgan va deyarli kulga aylangan. Baxtli tasodif tufayli, aviahujum sodir bo‘lgan vaqtda restoran ichida xodimlar va mijozlar bo‘lmagan.
Shu sababli hodisa oqibatida qurbonlar va jarohatlanganlar haqida ma’lumotlar kelib tushmagan. Restoran ma’muriyati o‘z mijozlariga murojaat qilib, muassasa o‘z faoliyatini vaqtincha Kiyev shahri, Garmatnaya ko‘chasi, birinchi uy manzilida joylashgan boshqa filiali orqali davom ettirishini ma’lum qildi.
Ta’kidlash joizki, bu Ukrainada o‘zbek oshxonasi bilan bog‘liq bo‘lgan ilk fojiali voqea emas. Bundan avval, 2022-yilda Ukrainaning Chuguyev shahrida mahalliy aholiga begaraz palov tarqatib kelgan o‘ttiz olti yoshli o‘zbekistonlik tadbirkor Sardor Hakimov Rossiyaning raketa zarbasi oqibatida halok bo‘lgan edi.
U hujum vaqtida bino yerto‘lasida bo‘lib, odamlar uchun milliy taom tayyorlashga hozirlik ko‘rayotgan paytda vafot etgan. Sardor Hakimov 2000-yildan buyon Lugansk viloyatining Severodonetsk shahrida istiqomat qilib kelgan.
Keyinchalik, 2014-yilda Chuguyev shahriga ko‘chib o‘tib, u yerda o‘zbek milliy taomlari tayyorlanadigan oshxona hamda ziravorlar do‘konini tashkil etgan edi. Rossiyaning Ukrainaga keng ko‘lamli harbiy bosqini boshlanganidan so‘ng u oilasini O‘zbekistonga jo‘natgan, biroq o‘zi Chuguyevda qolib, og‘ir vaziyatdagi mahalliy aholiga issiq ovqat tarqatish va insonparvarlik yordami ko‘rsatish ishlarini oxirigacha davom ettirgan.
