O'zbekistonlik tibbiyot xodimlari Italiyada yuqori maoshli ishga taklif etilmoqda
O'zbekistonlik tibbiyot xodimlari uchun Yevropaning nufuzli davlatlaridan biri bo'lgan Italiyada mehnat faoliyatini olib borish imkoniyati yaratilmoqda. Bu haqda Zamin.uz xabar berdi.
Tashqi mehnat migratsiyasi agentligi bergan ma'lumotlarga ko'ra, Italiyaning Sardiniya hududidagi tibbiyot muassasalariga shifokorlar va hamshiralar yuqori maoshli ishga taklif etilmoqda. Ushbu loyiha doirasida har yili jami 100 nafar malakali mutaxassisni ish bilan ta'minlash ko'zda tutilgan.
Bo'sh ish o'rinlari shoshilinch tibbiy yordam shifokorlari hamda oliy ma'lumotli hamshiralar uchun ochiq deb e'lon qilindi. Shifokorlik lavozimiga magistratura yoki klinik ordinaturani tamomlagan, shuningdek, tegishli yo'nalish bo'yicha maxsus sertifikatga ega bo'lgan mutaxassislar hujjat topshirishlari mumkin.
Hamshiralik ishi bo'yicha esa bakalavr darajasiga ega bo'lgan nomzodlar ko'rib chiqiladi. Tanlovda ishtirok etuvchilarning yoshi 50 dan oshmagan bo'lishi lozim, biroq 40 yoshgacha bo'lgan mutaxassislarga asosiy ustuvorlik beriladi.
Nomzodlardan ish tajribasi talab etilmaydi, lekin tajribaga ega bo'lgan shaxslar qo'shimcha afzalliklarga ega bo'ladilar. Dastur shartlariga ko'ra, tanlab olingan nomzodlar dastlab Italiyaning Peruja universiteti bilan hamkorlikda tashkil etiladigan italyan tili kurslarida tahsil oladilar.
Yetti oy davom etadigan ushbu mashg'ulotlar onlayn tarzda, ishdan ajralmagan holda va nomzodlar uchun qulay vaqtda o'tkaziladi. Eng ahamiyatli jihati shundaki, oylik 600 yevro miqdoridagi o'qish xarajatlari Migratsiya agentligi tomonidan to'liq qoplab beriladi.
Til kurslarini muvaffaqiyatli yakunlab, tegishli darajani qo'lga kiritgan mutaxassislar Italiyada 3500 yevrogacha bo'lgan oylik maosh bilan ish boshlashlari mumkin. Shuningdek, qo'shimcha ish soatlari va tungi navbatchiliklar uchun to'lanadigan ustamalar hisobiga oylik daromad miqdori 4000 yevrodan 5000 yevrogacha yetishi kutilmoqda.
Ish tartibi haftasiga 38 soatni tashkil etadi. Ish beruvchi tomonidan xodimlarga munosib mehnat va yashash sharoitlari kafolatlanadi.
Xususan, turar joy xarajatlari qoplanadi, xodimlar bepul tushlik bilan ta'minlanadi hamda ularning salomatligi uchun bepul tibbiy sug'urta rasmiylashtiriladi. Ushbu imkoniyatdan foydalanmoqchi bo'lgan fuqarolar maxsus havola orqali ro'yxatdan o'tishlari yoki agentlikning aloqa raqamlariga bog'lanib, batafsil ma'lumot olishlari mumkin.
