Misrda dunyodagi eng yirik harbiy qo‘mondonlik qarorgohi ish boshladi
Misr poytaxti Qohira shahridan taxminan 45 kilometr sharqiy yo‘nalishda qad ko‘targan yangi ma’muriy markazda dunyodagi eng yirik harbiy qo‘mondonlik qarorgohi rasman ish boshladi. Bu haqda Zamin.uz xabar berdi.
O‘ziga xos sakkiz burchakli me’moriy ko‘rinishi sababli ushbu ulkan majmua Oktagon deb nom oldi. Bu haqda Misrning nufuzli nashrlari batafsil ma’lumot tarqatdi.
Misr Qurolli kuchlarining yangi Strategik qo‘mondonlik shtabi mamlakat harbiy boshqaruv tizimining eng muhim bo‘g‘iniga aylanishi ko‘zda tutilgan. Ushbu yirik inshoot armiya bo‘linmalari, davlat vazirliklari va boshqa huquqni muhofaza qiluvchi idoralar o‘rtasida yagona boshqaruv, aloqa hamda harakatlarni muvofiqlashtirish markazi vazifasini o‘taydi.
Oktagon majmuasi Misr Qurolli kuchlarining turli qo‘shin turlari va strategik bo‘linmalarini ramziy ma’noda ifodalovchi, o‘zaro uzviy bog‘langan sakkizta asosiy binodan iborat. Majmuaning qoq markazida joylashgan bosh qo‘mondonlik binosi harbiy rahbariyat o‘rtasida tezkor ma’lumot almashish va muhim qarorlarni birgalikda qabul qilish uchun barcha sharoitlarni yaratadi.
Qariyb 92 kvadrat kilometr maydonni egallagan mazkur hudud 13 ta strategik va logistik qismga ajratilgan. Inshoot eng zamonaviy yerosti ma’lumotlar markazlari, raqamli infratuzilma, sun’iy yo‘ldosh orqali razvedka qilish tizimlari hamda katta hajmdagi ma’lumotlarni tahlil qiluvchi aqlli texnologiyalar bilan ta’minlangan.
Shuningdek, majmuada kiberxavfsizlikni ta’minlovchi eng ilg‘or vositalar o‘rnatilgan. Mutaxassislarning ta’kidlashicha, ushbu obyekt kuchli portlashlar va havo hujumlariga bardosh beradigan maxsus muhandislik yechimlari asosida barpo etilgan.
Majmua tashqi manbalardan mustaqil ravishda elektr energiyasi, suv va sovutish tizimlari bilan ta’minlangan bo‘lib, har qanday favqulodda vaziyatda ham o‘z faoliyatini to‘xtatmasdan davom ettira oladi. Loyiha mualliflariga ko‘ra, inshootning tashqi ko‘rinishi qadimgi Misr madaniyati ramzlari hamda tartib va aniqlikni anglatuvchi geometrik shakllardan ilhomlanib yaratilgan.
Yangi shtab-kvartira strategik qarorlarni qisqa muddatlarda qabul qilish, inqirozli holatlarni markazlashgan holda boshqarish va mamlakatning mudofaa qudratini yanada oshirishga xizmat qiladi.
