Damashqda Makron to'xtagan mehmonxona yaqinida portlashlar sodir bo'ldi
Yetti iyul tongida Suriya poytaxti Damashq shahrida ketma-ket ikki kuchli portlash yuz berdi. Bu haqda Zamin.uz xabar berdi.
Mazkur hodisa Fransiya prezidenti Emmanuel Makron vaqtincha istiqomat qilayotgan mashhur mehmonxona yaqinida sodir bo‘lgani bilan jamoatchilik e’tiborini tortdi. Dastlabki ma’lumotlarga ko‘ra, portlashlar oqibatida to‘rt kishi hayotdan ko‘z yumgan, o‘n sakkiz nafar fuqaro esa turli darajadagi tan jarohatlari bilan shifoxonaga yotqizilgan.
Fransiya rahbari boshchiligidagi delegatsiya korteji ushbu mudhish hodisadan bir necha daqiqa oldin mehmonxona hududini tark etishga ulgurgan edi. Xavfsizlik xizmati vakillarining xabar berishicha, portlovchi qurilmalar ikki xil joyga yashirilgan.
Ulardan biri mehmonxona yaqinidagi chiqindi qutisiga joylashtirilgan bo‘lsa, ikkinchisi yo‘l chetida qoldirilgan avtomobil ichiga o‘rnatilgan. Hozircha ushbu teraktni kim tashkil etgani va hujumdan ko‘zlangan asosiy maqsad aynan nima bo‘lgani haqida rasmiy ma’lumotlar e’lon qilinmadi.
Shunga qaramay, voqea joyida huquqni muhofaza qiluvchi organlar va tez tibbiy yordam xodimlari o‘z ishini davom ettirmoqda. Fransiya tomoni ushbu hodisa yuzasidan izoh berar ekan, prezident korteji harakatlanayotgan vaqtda hech qanday portlash ovozi eshitilmaganini ta’kidladi.
Ayni damda Emmanuel Makron Suriya rahbariyati bilan muzokaralar o‘tkazish uchun prezident saroyida bo‘lib turibdi. Mazkur tashrif siyosiy jihatdan g‘oyat muhim ahamiyatga ega, chunki Makron so‘nggi o‘n besh yil ichida Suriyaga qadam qo‘ygan birinchi Fransiya rahbari hamda 2024-yildagi siyosiy o‘zgarishlardan keyin ushbu mamlakatga kelgan Yevropa Ittifoqining ilk yetakchisi hisoblanadi.
Damashqdagi ushbu portlashlar Fransiya prezidentining tarixiy tashrifi bilan bir vaqtga to‘g‘ri kelgani ko‘plab savollarni keltirib chiqarmoqda. Hozirda mutaxassislar ushbu hujum tasodifiy harakat ekanligi yoki yuqori martabali mehmonning tashrifiga atalgan rejalashtirilgan fitna ekanligini sinchiklab o‘rganmoqdalar.
Poyaxtdagi xavfsizlik choralari kuchaytirilgan bo‘lib, vaziyat to‘liq nazorat ostiga olingan.
